ហូឡង់ ៖ កសិករដែលកំពុងតវ៉ាទាមទារឲ្យមានតម្លៃសមរម្យសម្រាប់ការលក់ផលិតផលរបស់ពួកគេ បានបិទព្រំដែនរវាងប្រទេសបែលហ្ស៊ិក និងហូឡង់កាលពីថ្ងៃសុក្រ។

ការតវ៉ារបស់កសិករ បានផ្ទុះឡើងនៅក្នុងបណ្តាប្រទេសជាច្រើននៅអឺរ៉ុប ចាប់ពីប្រទេសបារាំង រហូតដល់ប្រទេសប៉ូឡូញ ដោយបង្ហាញពីភាពតានតឹងលើផលប៉ះពាល់លើការធ្វើកសិកម្ម នៃការជំរុញរបស់សហភាពអឺរ៉ុប ក្នុងការប្រយុទ្ធប្រឆាំងបម្រែបម្រួលអាកាសធាតុ ការកើនឡើងការខាតបង់ និងការប្រកួតប្រជែងពីបរទេស។

ការខកចិត្ត បានកើតឡើងនៅទីក្រុងប្រ៊ុចសែលក្នុងសប្តាហ៍នេះ ជាកន្លែងដែលកសិករគប់ស៊ុត និងដុំថ្មដាក់សភាអឺរ៉ុប ហើយបានបាញ់កាំជ្រួច ខណៈពួកគេទាមទារឱ្យមេដឹកនាំសហភាពអឺរ៉ុបនៅក្នុងកិច្ចប្រជុំកំពូលមួយ ធ្វើការងារបន្ថែមទៀតដើម្បីជួយពួកគេ។

កសិករបែលហ្ស៊ិក និងហូឡង់ បានបិទច្រកព្រំដែនជាច្រើនរវាងប្រទេសរបស់ពួកគេ កាលពីថ្ងៃសុក្រ ខណៈពួកគេបានបន្តរារាំងរថយន្តដឹកទំនិញ មិនឲ្យចូល ឬចាកចេញពីកំពង់ផែ Zeebrugge ដែលគ្រប់គ្រងការនាំចូលរថយន្ត និងផលិតផលថ្មីៗមួយចំនួន មកពីចក្រភពអង់គ្លេស និងកន្លែងផ្សេងទៀត។