ភ្នំពេញ ៖ អាជ្ញាធររាជធានីភ្នំពេញមិនអនុញ្ញាតឱ្យមានការបំពានយកចិញ្ចើមផ្លូវសាធារណៈទៅដាក់លក់យានយន្តទៀតទេ ដោយទុករយៈពេល២ខែ ដើម្បីឱ្យគ្រប់ទីតាំងទាំងនោះ ផ្លាស់ប្តូររកទីតាំងថ្មី។

ឯកឧត្ដម ឃួង ស្រេង អភិបាលរាជធានីភ្នំពេញ បានដាក់បទបញ្ជាឱ្យអាជ្ញាធរខណ្ឌនៅកណ្ដាលរាជធានីភ្នំពេញ ត្រូវរៀបចំសណ្ដាប់ធ្នាប់ឱ្យបានល្អប្រសើរ ដោយមិនមានការអនុញ្ញាតឱ្យមានការបំពានយកចិញ្ចើមផ្លូវសាធារណៈទៅដាក់លក់យានយន្តទៀតទេ អាជ្ញាធររាជធានីភ្នំពេញនឹងទុករយៈពេលឱ្យ២ខែ ដើម្បីរុះរើ ឬផ្លាស់ប្តូរទីតាំងថ្មីទៅនៅជាយក្រុងនៃរាជធានីភ្នំពេញវិញ។ នេះគឺជាបទបញ្ជារបស់ ឯកឧត្ដម ឃួង ស្រេង ដែលបានលើកឡើងកាលពីល្ងាចថ្ងៃទី២៩ ខែមិថុនា ឆ្នាំ២០២១ ក្នុងកិច្ចប្រជុំជាមួយអាជ្ញាធរខណ្ឌទាំង១៤ នៅសាលារាជធានីភ្នំពេញ។

ឯកឧត្ដម ឃួង ស្រេង បញ្ជាក់ថា ល្មមដល់ពេលដែលយើងត្រូវរៀបចំសណ្ដាប់ធ្នាប់នៅក្នុងរាជធានីភ្នំពេញ ពិសេសនៅក្នុងខណ្ឌចំនួន៥ នៅកណ្ដាលរាជធានីភ្នំពេញ ឱ្យមានសណ្ដាប់ធ្នាប់ល្អប្រសើរហើយ ។ ដូច្នេះអាជ្ញាធរខណ្ឌពាក់ព័ន្ធនៅកណ្ដាលក្រុងត្រូវតែធ្វើសេចក្តីជូនដំណឹងឱ្យប្រជាពលរដ្ឋដែលប្រកបមុខរបរលក់ម៉ូតូ និងលក់រថយន្ត ដោយប្រើប្រាស់ចិញ្ចើមផ្លូវសាធារណៈធ្វើអាជីវកម្មបែបអនាធិបតេយ្យនោះ ត្រូវប្រញាប់រុះរើទីតាំងរបស់ខ្លួនទៅនៅជាយរាជធានីភ្នំពេញវិញ។ មកដល់ពេលនេះ យើងឈប់និយាយរឿងប្រើប្រាស់ចិញ្ចើមផ្លូវ២ភាគ៣ទៀតហើយ ព្រោះរដ្ឋបាលរាជធានីភ្នំពេញបានធ្វើការអនុគ្រោះជាច្រើនឆ្នាំកន្លងមកហើយ ប៉ុន្តែប្រជាពលរដ្ឋមួយចំនួនមិនចូលរួមជាមួយអាជ្ញាធររាជធានីភ្នំពេញជុំវិញការរៀបចំសណ្ដាប់ធ្នាប់សាធារណៈនោះទេ។ 

ឯកឧត្ដម ឃួង ស្រេង សង្កត់ធ្ងន់ថា ដូច្នេះចាប់ពីពេលនេះតទៅ គឺមិនមានការអនុញ្ញាតឱ្យមានការប្រើប្រាស់ចិញ្ចើមផ្លូវធ្វើអាជីវកម្មបន្តទៀតទេ ។ ប្រជាពលរដ្ឋអាចធ្វើអាជីវកម្មលក់ដូរបាន ប៉ុន្តែមិនអនុញ្ញាតឱ្យប្រើប្រាស់ចិញ្ចើមផ្លូវនោះទេ គឺមានន័យថា អាចលក់ម៉ូតូ លក់រថយន្តនៅក្នុងផ្ទះ ឬទីតាំងរបស់ខ្លួន ដោយមិនឱ្យបំពានលើចិញ្ចើមផ្លូវសាធារណៈជាដាច់ខាត សូម្បីតែ២ភាគ៣ក៏ដោយ បើមិនដូច្នេះទេ រដ្ឋបាលរាជធានីភ្នំពេញនឹងអនុវត្តវិធានការទៅតាមផ្លូវច្បាប់ដោយមិនមានការលើកលែងឡើយ៕ អត្ថបទ ៖ ប្រាក់ វ៉ាន់ដា