ភ្នំពេញ៖ មជ្ឈមណ្ឌលកែសម្ជស្ស អុីខេ (EK Esthetic Center) ដែលមានទីតាំងស្ថិតនៅសង្កាត់ទួលស្វាយព្រៃ ខណ្ឌចំការមន បានប្រកាសសម្ពោធជាផ្លូវការ នៅព្រឹកថ្ងៃទី៣ ខែកុម្ភៈ ឆ្នាំ២០២៤នេះ ក្រោមអធិបតីភាពរបស់ ឯកឧត្តម ឯក ក្រិត្យ រដ្ឋលេខាធិការក្រសួងសង្គមកិច្ច អតីតយុទ្ធជន និងយុវនីតិសម្បទា និងមានការចូលរួមពីភ្ញៀវកិត្តិយសជាតិ និងអន្តរជាតិជាច្រើនរូប។

មជ្ឈមណ្ឌលកែសម្ជស្ស អុីខេ ឯកទេសខាងផ្នែកវះកាត់ និងមិនវះកាត់ ជាមួយវេជ្ជបណ្ឌិតដែលបញ្ចប់ការសិក្សាមកពីក្រៅប្រទេស ដូចជា អាម៉េរិក បារំាង ថៃ និងម៉ាឡេស៊ី ដោយផ្តោតលើសេវាធំៗចំនួន៥ រួមមាន ព្យាបាលជំងឺសើរស្បែកទូទៅ, សម្រស់ស្បែកដោយមិនវះកាត់, ប្រឆាំងភាពចាស់, ព្យាបាលដោយឡាស៊ែរ និងវះកាត់កែសម្ជស្ស។

វេជ្ជបណ្ឌិត ឯក ផាណារី នាយកប្រតិបត្តិ និងជាស្ថាបនិកនៃមជ្ឈមណ្ឌលកែសម្ជស្ស អុីខេ នៅក្នុងកម្មវិធីសម្ពោធនេះ បានមានប្រសាសន៍ឲ្យដឹងថា ការសម្រេចបើកមជ្ឈមណ្ឌលនេះ គឺដើម្បីរួមចំណែកក្នុងការអភិវឌ្ឍន៍ប្រទេសកម្ពុជាកាន់តែរីកចម្រើនបន្ថែមទៀតក្នុងវិស័យសុខាភិបាលផ្នែកកែសម្ជស្ស តាមរយៈការជួយផ្តល់សេវាកម្មដែលត្រូវនឹងជំនាញ ដើម្បីសុវត្ថិភាពជូនប្រជាជន។ លើសពីនេះទៀត ដោយសារការមើលឃើញថា ប្រទេសកម្ពុជាកំពុងទទួលបានសុខសន្តិភាព ដែលអាចវិនិយោគបានក្នុងការប្រកបមុខរបរលើវិស័យផ្នែកសម្ជស្សនេះ ជាពិសេសដើម្បីឆ្លើយតបទៅនឹងតម្រូវការរបស់អតិថិជនដែលស្រលាញ់ និងគិតគូរពីសុខភាពសម្រស់ជាចម្បង។

ឯកឧត្តម ឯក ក្រិត្យ ក្នុងពិធីសម្ពោធនាឱកាសនោះ បានសម្តែងការអបអរសាទរ និងណែនាំឲ្យមជ្ឈមណ្ឌល អុីខេ ត្រូវខិតខំយ៉ាងណានាំយកចំណេះដឹង និងបទពិសោធន៍ដែលទទួលបានមកពីក្រៅប្រទេស មកចូលរួមជាមួយរដ្ឋាភិបាលកម្ពុជាអាណត្តិទី៧នេះឲ្យកាន់តែសំបូរបែបលើគ្រប់វិស័យដើម្បីបម្រើជាតិមាតុភូមិ។ បន្ថែមពីនេះ ជួយកាត់បន្ថយការចំណាយថវិការបស់ប្រជាជន ដែលប្រើប្រាស់សេវាកម្មកែសម្ជស្សនៅក្រៅប្រទេស ពិសេសប្រទេសជិតខាង។​ ទាំងនេះសុទ្ធតែត្រូវចំណាយពេលវេលា និងលុយកាក់យ៉ាងច្រើនសន្ធឹកសន្ទាប់៕ ដោយ ៖ បូរ៉ាវី