សហរដ្ឋអាមេរិកបានវាយប្រហារទាំងយប់លើក្រុមនានាដែលគាំទ្រដោយអ៊ីរ៉ង់នៅក្នុងប្រទេសអ៊ីរ៉ាក់ និងស៊ីរី ជាការសងសឹកចំពោះការវាយប្រហារដ៏សាហាវទៅលើទាហានអាមេរិក ដោយបានបង្កឲ្យមានការថ្កោលទោសពីថ្ងៃសៅរ៍ ទី៣កុម្ភៈពីរដ្ឋាភិបាល និងក្រុមផ្សេងៗនៅក្នុងតំបន់។   

សហរដ្ឋអាមេរិក ដែលសន្យាថានឹងមានការវាយប្រហារបន្ថែមទៀត បានបន្ទោសការវាយប្រហារដោយយានដ្រូនកាលពីថ្ងៃអាទិត្យលើមូលដ្ឋានទ័ពអាមេរិកនៅហ្ស៊កដានី លើកងកម្លាំងគាំទ្រដោយអ៊ីរ៉ង់។   

ទោះជាយ៉ាងនេះក្តី កងកម្លាំងសហរដ្ឋអាមេរិក ពុំបានវាយប្រហារនៅក្នុងទឹកដីអ៊ីរ៉ង់នោះទេ ដោយទាំងទីក្រុងវ៉ាស៊ីនតោន និងទីក្រុងតេអេរ៉ង់ ទំនងចង់បញ្ចៀសការផ្ទុះសង្គ្រាមដូចគ្នា។ 

ប៉ុន្តែទន្ទឹមនឹងភាពតានតឹងកំពុងកើនឡើងខ្លាំងក្នុងសង្រ្គាមអ៊ីស្រាអែល និងក្រុមហាម៉ាស នៅតំបន់ហ្កាហ្សា ទាំងរដ្ឋាភិបាលស៊ីរី ទាំងអ៊ីរ៉ាក់ បានចូលរួមជាមួយទីក្រុងតេអេរ៉ង់ក្នុងការចោទប្រកាន់ក្រុងវ៉ាស៊ីនតោន ថាបានបំផ្លាញស្ថិរភាពក្នុងតំបន់។

អ្នកនាំពាក្យក្រុមប្រឹក្សាសន្តិសុខជាតិអាមេរិក លោក John Kirby បាននិយាយថា យន្តហោះចម្បាំងរបស់សហរដ្ឋអាមេរិក បានវាយប្រហារលើគោលដៅជាង ៨៥កន្លែង នៅទីតាំងចំនួន៧ក្នុងនោះ៤ ទីតាំងនៅស៊ីរី និង៣ទីតាំងនៅអ៊ីរ៉ាក់។ លោកបានបន្ថែមថា គោលដៅទាំងនេះត្រូវបានជ្រើសរើសយ៉ាងយកចិត្តទុកដាក់ដើម្បីបញ្ចៀសការស្លាប់ជនស៊ីវិល។

ប៉ុន្តែរដ្ឋាភិបាលអ៊ីរ៉ាក់បាននិយាយថា ជនស៊ីវិលស្ថិតក្នុងចំណោមមនុស្សយ៉ាងហោចណាស់ ១៦ នាក់ដែលបានស្លាប់នៅភាគខាងលិចរបស់ប្រទេស ហើយទីក្រុងដាម៉ាស ក៏បានរាយការណ៍ពីការស្លាប់របស់ជនស៊ីវិលផងដែរ ប៉ុន្តែអង្គការឃ្លាំមើលសង្គ្រាមបាននិយាយថា មនុស្ស២៩ នាក់ដែលត្រូវបានសម្លាប់នៅក្នុងការវាយប្រហាររបស់សហរដ្ឋអាមេរិកលើប្រទេសស៊ីរី គឺជាក្រុមអ្នកប្រយុទ្ធ។អ្នកនាំពាក្យរដ្ឋាភិបាលអ៊ីរ៉ាក់ លោក Bassem al-Awadi បាននិយាយថា ការវាយប្រហារតាមអាកាសដ៏ខ្លាំងក្លានេះនឹងរុញច្រានស្ថានការណ៍សន្តិសុខនៅក្នុងប្រទេសអ៊ីរ៉ាក់ និងតំបន់នេះ ឲ្យធ្លាក់ចូលក្នុងមាត់ជ្រោះ៕