ក្រុមអ្នកពន្លត់អគ្គិភ័យ បានព្យាយាមពន្លត់អណ្ដាតភ្លើងយ៉ាងសន្ធោសន្ធៅកាលពីថ្ងៃអាទិត្យ នៅ​ប្រទេសឈីលីភាគកណ្ដាល ​ដែលបានឆាបឆេះឡើងកាលពីពីរថ្ងៃមុននេះ ខណៈក្រុម​មន្ត្រី​បាន​បន្ថែម​បម្រាម​គោចរ​នៅក្នុងទីក្រុងដែលរងផលប៉ះពាល់ខ្លាំងបំផុត ដោយសារចំហេះព្រៃ ហើយ​បាន​​និយាយថា មនុស្សយ៉ាងហោចណាស់ ៩៩ នាក់បានស្លាប់។ 

ភ្លើងបានឆាបឆេះខ្លាំងបំផុតជុំវិញទីក្រុង វីណាឌេលម៉ា(Viña del Mar) ជាទីដែលសួនរុក្ខសាស្ត្រ​ដ៏​ល្បីល្បាញ ដែលបានបង្កើតឡើងក្នុងឆ្នាំ ១៩៣១ ត្រូវបានរងការបំផ្លិចបំ​ផ្លាញ​ដោយ​អណ្តាត​ភ្លើង​កាល​ពីថ្ងៃអាទិត្យ។ មនុស្សយ៉ាងហោចណាស់១.៦០០ នាក់បាត់បង់ផ្ទះសម្បែង។

ភូមិឋានជាច្រើននៅភាគខាងកើតទីក្រុងវីណាឌេលម៉ា(Viña del Mar) ត្រូវបាន​អណ្តាត​ភ្លើង​ឆេះ​បំផ្លាញ និងគ្របដណ្ដប់ដោយផ្សែង ធ្វើអោយមនុស្សមួយចំនួនជាប់នៅក្នុងផ្ទះរបស់ពួកគេ។ ក្រុម​មន្ត្រី​បាន​និយាយថា មនុស្ស ២០០នាក់ត្រូគេរាយការណ៍ថាបានបាត់ខ្លួននៅក្នុងទីក្រុង វីណា ឌេល ម៉ា និងតំបន់ជុំវិញនោះ។ទីក្រុងដែលមានមនុស្សរស់នៅប្រមាណ ៣០ម៉ឺននាក់ គឺ​ជា​រមណីយដ្ឋាន​ឆ្នេរដ៏ពេញនិយមមួយ ហើយថែម​ទាំង​ជា​ទីតាំង​ សម្រាប់​រៀបចំ​ពិធី​បុណ្យ​តន្ត្រី​ដ៏​ល្បីមួ​យ​ក្នុងអំឡុងពេលរដូវក្តៅនៃអឌ្ឍគោលខាងត្បូងទៀតផង។     

កាលពីព្រឹកថ្ងៃអាទិត្យ ប្រធានាធិបតីឈីលី លោកកាព្រីយ៉ែល បូរិច (Gabriel Boric) បាន​ចុះ​ត្រួត​ពិនិត្យ ស្ថានភាព នៅទីក្រុងឃ្វីលប៉េ(Quilpé) ដែលត្រូវ​បាន​រង​ផល​ប៉ះពាល់​យ៉ាង​ខ្លាំងដោ​យ​ចំហេះ​ព្រៃ ដែលបានរាយការណ៍ថាមនុស្ស៦៤ នាក់បានស្លាប់ផងដែរ។ នៅពេលរសៀល សេវា​វេជ្ជ​សាស្ត្រ​កោសល្យវិច្ច័យរបស់ប្រទេសឈីលីបានធ្វើបច្ចុប្បន្នភាពចំនួនអ្នកស្លាប់ឡើងដល់ទៅ ៩៩នាក់ នៅក្នុងសារដែលបានចេញផ្សាយនៅលើបណ្ដាញសង្គម X ។   

ទីភ្នាក់ងារនេះបាននិយាយនៅក្នុងសេចក្តីថ្លែងការណ៍មួយដែលបានបង្ហោះនៅលើគេហទំព័ររបស់ខ្លួនថា យើងសោកស្តាយចំពោះសោកនាដកម្មដែលកំពុងកើតឡើង ហើយ​យើង​សូម​ចូលរួម​រំលែក​ទុក្ខ​របស់យើងទៅកាន់គ្រួសារដែលរងផលប៉ះពាល់ ។ លោក Boric បាននិយាយ​ថា​ចំនួនអ្ន​ក​ស្លាប់​អាចកើ​ន​ឡើ​ង​នៅ​ពេល​ដែល​ក្រុម​អ្នក​ជួយ​សង្គ្រោះ​ស្វែង​រក​តាម​ផ្ទះដែល​បាន​ដួល​រលំ​។ អ្នកខ្លះមកដល់មន្ទីរពេទ្យក៏ស្ថិតក្នុងស្ថានភាពធ្ងន់ធ្ងរដែរ៕