សេតវិមាន បានព្រមានថា ការវាយប្រហារតាមអាកាសរបស់ខ្លួនលើគោលដៅនានារបស់ក្រុមដែលគាំទ្រដោយអ៊ីរ៉ង់នៅក្នុងប្រទេសអ៊ីរ៉ាក់ និងស៊ីរី គ្រាន់តែជការចាប់ផ្តើមប៉ុណ្ណោះ មិនមែនជាការបញ្ចប់ នៃការឆ្លើយតបរបស់ខ្លួនចំពោះអ៊ីរ៉ង់នោះទេ។

ទីប្រឹក្សាសន្តិសុខជាតិលោក ជែក ស៊ូឡេវ៉ាន់ (Jake Sullivan)បានប្រាប់ប្រព័ន្ធផ្សព្វផ្សាយអាមេរិកកាលពីថ្ងៃអាទិត្យថា នឹងមានជំហានបន្ថែមទៀត។សហរដ្ឋអាមេរិក កំពុងឆ្លើយតបទៅនឹងការស្លាប់របស់ទាហានបីនាក់នៅក្នុងការវាយប្រហារដោយយានដ្រូន របស់សត្រូវទៅលើមូលដ្ឋានយោធាមួយក្នុងប្រទេសហ្ស៊កដានីកាលពីសប្តាហ៍មុន។ទោះបីជាអ៊ីរ៉ង់បដិសេធការជាប់ពាក់ព័ន្ធក៏ដោយ សាខារបស់ខ្លួនគឺក្រុមចលនាតស៊ូអ៊ីស្លាមនៅអ៊ីរ៉ាក់បានអះអាងទទួលខុសត្រូវ។

សហរដ្ឋអាមេរិក បានចោទប្រកាន់ទីក្រុងតេអេរ៉ង់ ថាមានស្នាកស្នាមលើការវាយប្រហារនេះ ហើយបាននិយាយថាយានដ្រូននោះ ត្រូវបានផលិតដោយអ៊ីរ៉ង់។

នៅក្នុងលិខិតមួយផ្ញើទៅកាន់សភាកាលពីថ្ងៃអាទិត្យ ស្ថិតនៅក្រោមច្បាប់ដែលលោកត្រូវតម្រូវឱ្យផ្ញើក្នុងរយៈពេល ៤៨ ម៉ោងនៃសកម្មភាពយោធា លោកប្រធានាធិបតី Joe Biden បាននិយាយថាការវាយប្រហារសងសឹកកាលពីថ្ងៃសុក្របានដាក់គោលដៅលើទីតាំងនានា ប្រើប្រាស់ដោយកងកម្លាំងប្រដាប់អាវុធអ៊ីរ៉ង់ ជាកងឆ្មាំបដិវត្តអ៊ីស្លាម (IRGC) និងក្រុមជីវពលដែលមានទំនាក់ទំនងជាមួយ កងឆ្មាំបដិវត្តអ៊ីស្លាម ។

កងឆ្មាំបដិវត្តអ៊ីស្លាម ត្រូវគេជឿថាជាក្រុមប្រដាប់អាវុធ ដែលត្រូវបានផ្តល់មូលនិធិ និងបណ្តុះបណ្តាលដល់ក្រុមតស៊ូអ៊ីស្លាមនៅអ៊ីរ៉ាក់។

លោក Biden បាននិយាយថា រួមទាំងកន្លែងប្រើប្រាស់សម្រាប់ បញ្ជា និងគ្រប់គ្រង ឃ្លាំងស្តុកអាវុធ ការហ្វឹកហាត់ ការគាំទ្រផ្នែកដឹកជញ្ជូន និងគោលបំណងផ្សេងទៀត។

លោកបានបន្ថែមថា ការវាយប្រហារទាំងនោះ ក្នុងគោលបំណងរារាំងក្រុមទាំងនេះកុំឲ្យវាយប្រហារបន្ថែមទៀត ហើយត្រូវបានធ្វើឡើងក្នុងវិធីមួយ ដើម្បីកាត់បន្ថយហានិភ័យនៃការកើនឡើង និងជៀសវាងការស្លាប់ជនស៊ីវិល៕