ប្រជាពលរដ្ឋខ្មែរ នៅប្រទេសថៃ ចេញប្រកាស​គាំទ្រជាបន្តបន្ទាប់​នៃ​ដំណើរ​ទស្សនកិច្ចទៅ​ប្រទេស​ថៃ​​​របស់​សម្តេច​មហា​បវរធិបតី ហ៊ុន ម៉ាណែត នាយករដ្ឋមន្ត្រី នៃ​ព្រះរាជាណាចក្រកម្ពុជា​​នៅ​សប្តាហ៍​​នេះ។

កញ្ញា ញ៉ែម សិលា អាជីវករម្នាក់ដែលកំពុងរស់នៅប្រទេសថៃ បានប្រកាសស្វាគមន៍ចំពោះ​ដំណើរ​ទស្សនកិច្ច​របស់​សម្តេចនាយករដ្ឋមន្ត្រី។ វត្តមានរបស់ប្រមុខថ្នាក់ដឹកនាំជាន់ខ្ពស់របស់កម្ពុជានេះ​បាន​ធ្វើឱ្យកញ្ញា​ដែល​ឃ្លាតឆ្ងាយពី​ស្រុកកំណើតសប្បាយរីករាយ។

កញ្ញា ញ៉ែម សិលា៖ “នាងខ្ញុំពិតជាមានសេចក្តីសោមនស្សសប្បាយក្រៃលែង ហើយ​ក្នុង​នាម​នាង​ខ្ញុំ​ជាកូន​ខ្មែរមួយ​រូបនាងខ្ញុំ​សូមគាំទ្រសម្តេចឱ្យជោគជ័យក្នុងដំណើរទស្សនកិច្ចនេះ”។

ក្រៅពីនេះ លោកហង្ស បឿន និងក្រុមគ្រួសារ​ទាំងមូល​ដែល​ជា​ពាណិជ្ជករ​រស់​នៅ​ប្រកប​មុខ​របរ​នៅ​ទីក្រុង បាងកកប្រទេសថៃក៏សប្បាយចិត្តឥតឧបមាចំពោះដំណើរទស្សនកិច្ច នៃ​ថ្នាក់​ដឹក​នាំ​កំពូល​របស់​ខ្លួននៅលើទឹកដីប្រទេសថៃដើម្បីបំពេញទស្សនកិច្ចការងារ។

ក្រៅពីពលរដ្ឋទាំងពីរខាងលើនៅមានគ្រួសារខ្មែរ និងពលរដ្ឋខ្មែរជាច្រើននាក់ផ្សេងទៀត បាន​បង្ហោះ​សារ​គាំទ្រដល់ដំណើរ​ទស្សនកិច្ច​របស់​ប្រមុខ​រដ្ឋាភិបាល​ខ្លួន​ព្រោង​ព្រាត​លើ​បណ្តាញ​សង្គ​មហ្វេស​ប៊ុក និងតិកតុកជាដើម។

សូមបញ្ជាក់ថា ការផ្ទុះការគាំទ្រពីសំណាក់ពលរដ្ឋខ្មែរនៅថៃនេះ គឺនៅ​មុន​ពេល​ដែល​សម្តេច​មហា​បវរ​ធិបតី ហ៊ុន ម៉ាណែតនាយករដ្ឋមន្ត្រីនៃព្រះរាជាណាចក្រកម្ពុជា​នឹងដឹកនាំ​គណៈ​ប្រតិភូ​ទៅ​បំពេញ​ទស្សន​​កិច្ចនៅ​ប្រទេស​ថៃ នៅថ្ងៃទី៧ ខែកុម្ភៈ ខាងមុខនេះ៕