ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និង​កីឡា បានអំពាវនាវទៅដល់គ្រឹះស្ថានអប់រំឯកជននានា បង្កើនការបង្រៀនការសសេរ ការ​អាន​ភាសា​ខ្មែរដ​ល់សិស្សានុសិស្ស ដើម្បីលើកជួយលើកកម្ពស់ អក្សរសាស្ត្រជាតិ ។

ក្នុងពិធីសម្ពោធសាលារៀនអារីហ្សូនសាខាឫស្សីកែវថ្មី នាថ្ងៃទី៥ ខែកុម្ភៈ ឆ្នាំ២០២៤ ឯកឧត្តម​បណ្ឌិត​សភាចារ្យ មានប្រសាសន៍ថា ក្រសួងអប់រំកំពុងពង្រឹងនូវគុណភាព នៃការអប់រំនៅកម្ពុជា ក៏​ដូច​ជា​សីលធម៌ ចរិយាធម៌ សុជីវធម៌ គុណធម៌ និងឥរិយាបថល្អរបស់បុគ្គលិកអប់រំ និង​សិស្សា​នុសិស្ស​ ក៏ដូចជាការពិនិត្យកែសម្រួលកម្មវិធីសិក្សា សកម្មភាពក្រៅម៉ោងសិក្សា ដើម្បី​ពង្រឹង​ទាំង​ចំណេះ​ដឹង វិន័យ វិជ្ជាសម្បទា ចរិយាសម្បទា ក៏ដូចជាបំណិនសម្បទាផងដែរ ។

ឯកឧត្តម បានបន្ថែមថា ក្រសួងអប់រំ ក៏សូមលើកទឹកចិត្តសហការ ក្នុងការអនុវត្តនូវការអប់រំ តាម​បែប​ព្រះពុទ្ធសាសនានៅក្នុងសាលារៀន ដើម្បីលើកកម្ពស់ចរិយាសម្បទា និងយល់ដឹងពីវប្បធម៌ ក៏​ដូច​ជា​ពី​សាសនា បន្តលើកកម្ពស់នូវសុខភាពសិស្ស និងជំរុញដល់មាតាបិតា អាណា​ព្យាបាល​សិស្ស ​ក្នុងការធ្វើជាដៃគូ ដើម្បីការអប់រំ ។

ជាមួយនេះ ឯកឧត្តមឧបនាយករដ្ឋមន្ត្រី ក៏បានថ្លែងអំណរគុណសាលារៀនអារីហ្សូន ដែល​បាន​ចូល​រួម​ចំណែក​បណ្ដុះបណ្ដាលធនធានមនុស្ស ពីកម្រិតមត្តេយ្យ ដល់ថ្នាក់ទី១២ រាប់ពាន់ម៉ឺន​នាក់​រួច​មក​ហើយ និងសូមលើកទឹកចិត្តពង្រីកសាខាបន្ថែមទៀត និងឈាន​ដល់​បង្កើត​នូវ​ថ្នាក់​ឧត្តម​សិក្សា​ផង​ដែរ។

ឧកញ៉ាវេជ្ជបណ្ឌិត ជា សុខឃាង ជាស្ថាបនិក និងជាប្រធាននាយកប្រតិបត្តិស្ថាប័នអប់រំ អេជី លើក​ឡើង​ថា បន្ទាប់ពីបានឆ្លងកាត់បទពិសោធជិតសាមសិបឆ្នាំ លើវិស័យអប់រំឯកជន ស្ថាប័ន​អប់រំ​អេជី ពិតជាបានចូលរួមយ៉ាងសកម្ម ក្នុងការអភិវឌ្ឍមូលធនមនុស្ស ស្រប​ទៅ​តាម​គោល​នយោបាយ​អប់រំ របស់រាជរដ្ឋាភិបាលកម្ពុជា ដែលមានក្រសួងអប់រំយុវជន និងកីឡា ជា​សេនា​ធិការ ដោយឈរលើល្អបីយ៉ាងពោល គឺគ្រប់គ្រងល្អ បង្រៀនល្អ និងរៀនល្អ ។

លោកឧកញ៉ាវេជ្ជបណ្ឌិត បានបន្ថែមថា សាលារៀនអារីហ្សូន ផ្ដោតការសិក្សាលើកម្មវិធីជាតិ ប្រទេស​សឹង្ហបុរី និងចិន ហើយ​បេសកកម្ម​ជា​បន្ត​សាលា​រៀន​ធានា​ឱ្យ​បាន​ការ​ផ្ដល់​នូវ​សេវា​អប់រំ​ប្រក​ដោយ​គុណភាពខ្ពស់ ដល់សិស្សានុសិស្សចាប់ពីអាយុ៣ឆ្នាំឡើងទៅ, មានឆន្ទៈខ្ពស់​ក្នុង​ការ​ធ្វើ​បច្ចុប្បន្ន​ភាព និងទំនើបកម្មវិធីសិក្សា វិធីសាស្រ្តបង្រៀន និងរៀននាសតវត្សទី២១, សិស្ស​ត្រូវ​បាន​បណ្ដុះ​នូវ​វិជ្ចាសម្បទា បំណិនសម្បទា និងចរិតយាសម្បទាជាចម្បង, ធានាឱ្យ​មាន​វឌ្ឍនភាព​ទាំង​សេវា​អប់រំ និងធនធានហិរញ្ញវត្ថុ និងបុគ្គលិកនិយោជិតគ្រប់រូប និងទទួល​បាន​នូវ​កាលា​នុវត្ត​ភាព​ទាំង​ការ​អភិវឌ្ឍន៍សមត្ថភាពវិជ្ជាជីវៈ និងធនធានហិរញ្ញវត្ថុ៕ អត្ថបទ៖ បាន សុខរិទ្ធិ