សម្ដេចតេជោ ហ៊ុន សែន នាយករដ្ឋមន្ដ្រីនៃកម្ពុជាបានឆ្លើយតបទៅនឹងជនអគតិមួយក្តាប់តូចបាននិយាយថា សម្ដេចស្លាប់នោះ គួរតែគិតគូរពីសុខភាពរបស់ខ្លួនឯងវិញល្អប្រសើជាង ព្រោះការស្លាប់របស់មេដឹកនាំប្រទេស ត្រូវជូនដំណឹងដល់ប្រជាជនបានដឹងគ្រប់ៗគ្នា។
ការឆ្លើយតបរបស់សម្ដេចតេជោបែបនេះ បន្ទាប់ពីពួកក្រុមប្រឆាំងដែលភាគច្រើនរត់ចោលស្រុកទាំងនោះបាននាំគ្នាលើកឡើងថា សម្ដេចតេជោ ហ៊ុន សែន បានស្លាប់ហើយ មិនឲ្យប្រជាជនបានដឹង ។
ក្នុងឱកាសកិច្ចប្រជុំ និងថ្លែងសារពិសេសដោះស្រាយបញ្ហាជំងឺកូវីដ-១៩ដែលកំពុងរីករាលដាលនៅកម្ពុជា តាមប្រព័ន្ធវីដេអូ នាព្រឹកថ្ងៃទី១ ខែកក្កដា ឆ្នាំ២០២១ សម្ដេចតេជោ មានប្រសាសន៍ថា សម្តេចមិននឹកស្មានថា មកដល់ពេលនេះ មានពាក្យចចាមរាមអាក្រក់ពីខាងក្រៅថា សម្តេចបានស្លាប់ តាំងពីថ្ងៃទី២៣ មិថុនា ម៉ោង៤ល្ងាច ឯណោះ ក្នុងពេលដែលសម្តេចកំពុងជាប់ធ្វើចត្តាឡីស័កនោះ។
ជាមួយគ្នានោះដែរសម្ដេចតេជោនាយករដ្ឋមន្ត្រីបានបន្ដទៀតថា ប្រសិនបើមានការស្លាប់មែន ត្រូវចាំបាច់លាក់សពសម្ដេច ធ្វើអ្វី? ប្រសិនបើមានការស្លាប់ ពិតមែននោះ មកដល់ពេលនេះ មានរយៈពេល៧ថ្ងៃទៅហើយ ប្រហែលជារដ្ឋសភា ក៏ដូចជា ព្រះករុណា ព្រះបាទសម្តេច ព្រះបរមនាថ នរោត្តម សីហមុនី ព្រះមហាក្សត្រនៃកម្ពុជា តែងតាំងនាយករដ្ឋមន្ដ្រីថ្មី ដើម្បីដំណើរការរៀបរដ្ឋាភិបាលថ្មីផងដែរ។
សម្ដេចតេជោ ក៏បានពន្យល់ដល់ពួកក្រុមប្រឆាំងនៅក្រៅប្រទេសថា របៀបស្លាប់របស់មេដឹកនាំប្រទេស ត្រូវជូនដំណឹងដល់ប្រជាជាតិឲ្យបានដឹង ហើយពិធីបុណ្យសពរបស់មេដឹកនាំកម្រិតដូចសម្ដេច ប្រហែលមានកងកិត្តិយសដ៏ច្រើនមកអមសាកសពរបស់សម្ដេច ហើយប្រហែលជានាយករដ្ឋមន្ដ្រីថ្មី ឬក៏គណៈកម្មាធិការជាតិរៀបចំបុណ្យ តម្រូវឲ្យមានការទម្លាក់ទង់ជាតិ ដាក់កណ្ដាលដង ក៏អាចថាបាន តាមអ្វីមេដឹកនាំគ្រប់ប្រទេស ៕ អត្ថបទ៖ បានចក់
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
