បន្ទាយមានជ័យ​ ៖​ ឯកឧត្តម​ អ៊ុំ​ រាត្រី​ អភិបាលខេត្តបន្ទាយមានជ័យ​ បានជំរុញដល់រដ្ឋបាលក្រុង-ស្រុក​ មន្ទីរអង្គភាព​ជុំវិញខេត្ត​ ត្រូវបង្កើតក្រុមការងារអ្នកនាំពាក្យរបស់អង្គភាពនីមួយៗ​ ដើម្បី​ធ្វើការ​ឆ្លើយតប​ បកស្រាយរាល់ព័ត៌មាន​ ពាក់ព័ន្ធករណីដែលកើតមានឡើង​ ជា​ពិសេស​ព័ត៌មាន​បំពុល​សង្គម​ ដែលប៉ះពាលដល់កត្តិយសថ្នាក់ដឹកនាំ​ ដើម្បីឆ្លើយតប​ បកស្រាយ​ឱ្យ​បាន​ទាន់​ពេល​វេលា​។

ឯកឧត្តម​ អភិបាលខេត្តបាន​ជម្រុញណែនាំបែបនេះនៅក្នុងការប្រជុំ​ ជាមួយមន្ទីរ​ អង្គភាពពាក់ព័ន្ធ​ រដ្ឋ​បាលក្រុង-ស្រុក​ ក្រុមព័ត៌មាន​ ដើម្បីរៀបចំឱ្យមានអ្នកនាំពាក្យរបស់មន្ទីរអង្គភាព​ រដ្ឋបាល​ក្រុង​-ស្រុក​ ធ្វើឡើងនៅសាលប្រជុំ​ ខ​ សាលាខេត្តបន្ទាយមានជ័យ​ នាព្រឹកថ្ងៃទី០៥​ ខែកុម្ភៈ​ ឆ្នាំ​២០២៤​។

ឯកឧត្តម​ អ៊ុំ​ រាត្រី​ បានបញ្ជាក់ថា​ ការផ្តល់ព័ត៌មាន​ គឺជារឿងសំខាន់​ ដែលយើង​ត្រូវ​តែ​យក​ទៅ​ផ្សព្វ​ផ្សាយ​​​ឱ្យបានទូលំទូលាយ​ ជាពិសេសសមិទ្ធផល​នានា​ ដែលជា​ការ​ខិតខំ​ប្រឹងប្រែង​របស់​ប្រមុខ​រាជ​រដ្ឋាភិបាល​។ ក្នុងនោះ​អភិបាលខេត្ត​ ក៏បានចាត់ឱ្យបណ្តាររដ្ឋបាលក្រុង-ស្រុង​ មន្ទីរអង្គភាព​ពាក់ព័ន្ធ​ ត្រូវរៀបចំឱ្យមានអ្នកនាំពាក្យរបស់អង្គភាពរៀងៗខ្លួន​ ដើម្បីឆ្លើយតបនូវព័ត៌មានពាក់ព័ន្ធ​ករណីផ្សេង​ៗ ព័ត៌មានមិនពិត​បំពុលសង្គម ធ្វើបកស្រាយឆ្លើយតប​ ឱ្យបានទាន់វេលា​ ចៀស​វាង​ការ​បក​ស្រាយដោយគ្មានមូលដ្ឋានច្បាស់លាស់​ ធ្វេីឱ្យប៉ះពាល់ដល់អង្គភាព​ និងថ្នាក់ដឹកនាំ។

មួយវិញទៀត​ ឯកឧត្តម​ ក៏បានណែនាំដល់មន្ទីរព័ត៌មាន​ខេត្ត​ត្រូវ​ធ្វើ​ការ​ស្រង់​ស្ថិតិ​ចំនួន​អ្នក​សារ​ព័ត៌មាន​ អង្គភាពសារព័ត៌មានទាំងអស់ដែលមាននៅក្នុងខេត្តបន្ទាយមានជ័យ​ ដើម្បី​រាយការណ៍​ជូន​រដ្ឋបាលខេត្ត​ មួយវិញទៀតមន្ទីរព័ត៌មាន​ក៏ត្រូវគ្របគ្រង់ឱ្យបាន​ តាមដាន​រាល់​ការ​ចុះ​ផ្សាយ​ព័ត៌មាន​របស់អង្គភាពនីមួយៗ៕​ អត្ថបទ​៖​ រឿង​ ចន្ទ្រា