កំពង់ឆ្នាំង៖ ឯកឧត្តមបណ្ឌិតសភាចារ្យ អ៊ុក រ៉ាប៊ុន ទេសរដ្ឋមន្ត្រីទទួលបន្ទុកបេសកម្មពិសេស និងជាប្រធានក្រុមប្រឹក្សាស្តារ អភិវឌ្ឍន៍វិស័យកសិកម្ម និងជនបទ រួមនិងឯកឧត្តម ស៊ុន សុវណ្ណារិទ្ធិ អភិបាលខេត្តកំពង់ឆ្នាំង នៅថ្ងៃទី០៥ ខែកុម្ភៈ ឆ្នាំ២០២៤នេះ បានដឹកនាំក្រុមការងារ ចុះពិនិត្យស្រូវប្រាំងប្រជាកសិករនៅក្នុងឃុំស្វាយជ្រុំ ស្រុករលាប្អៀរ ដែលកំពុងជួបប្រទះនឹងការខ្វះទឹកស្រោចស្រពប្រមាណជាង២០០ហិកតា ក្នុងចំណោមស្រូវប្រាំងប្រមាណជាង១ពាន់ហិកតានៅតំបន់ទំនប់២០ឧសភានោះ ។

លោក ម៉ែន នួន មេឃុំស្វាយជ្រុំ ស្រុករលាប្អៀរ ខេត្តកំពង់ឆ្នាំង បានអោយដឹងថា៖ ដោយសារតែស្រូវឆ្នាំនេះមានតម្លៃថ្លៃ ជាងបណ្តាឆ្នាំមុនៗ នាំអោយប្រជាកសិករនៅក្នុងឃុំរបស់លោក បានខិតខំធ្វើស្រែប្រាំងទ្វេឡើង និងបានជួបប្រទះនឹងការខ្វះទឹកស្រោចស្រព ជាពិសេសតំបន់ស្រែប្រាំងនៅឆ្ងាយពីទំនប់២០ឧសភា ប្រមាណជិត៤គីឡូម៉ែត្រ មានស្រូវប្រាំងជាង២០០ហិកតា កំពុងជួបប្រទះនឹងការខ្វះខាតទឹក ។ ក៏ប៉ុន្តែដោយសារការចុះពិនិត្យ និងអន្តរាគមន៍ជាបន្តបន្ទាប់របស់ឯកឧត្តមបណ្ឌិតសភាចារ្យ អ៊ុក រ៉ាប៊ុន , ឯកឧត្តម ស៊ុន សុវណ្ណារិទ្ធិ អភិបាលខេត្តកំពង់ឆ្នាំង , ការជួយបន្ទាន់ពីមន្ទីរធនធានទឹក និងមន្ទីរកសិកម្មខេត្ត ក៏ដូចជាការជួយពីក្រុមការងាររាជរដ្ឋាភិបាលចុះជួយខេត្តកំពង់ឆ្នាំង បានធ្វើអោយប្រជាកសិករទទួលបាននូវទឹកស្រោចស្រពជាបន្តបន្ទាប់ ។ នៅក្នុងថ្ងៃនេះ ឯកឧត្តបណ្ឌិតសភាចារ្យ អ៊ុក រ៉ាប៊ុន តាមរយៈឯកឧត្តម ស៊ុន សុវណ្ណារិទ្ធិ អភិបាលខេត្ត បានជួយផ្តល់ប្រេងសម្រាប់បូមទឹកដាក់ស្រូវប្រាំងប្រជាកសិករឃុំស្វាយជ្រុំ២០០លីត្រ និងចំនួន៥០០លីត្រសម្រាប់ប្រជាកសិករក្នុងស្រុកកំពង់លែង។ ចំណែកលោក ដោក ប៊ុនថុន ប្រធានមន្ទីរធនធានទឹកជួយប្រេង២០០លីត្រ និងលោក ងិន ហ៊ុន ប្រធានមន្ទីរកសិកម្ម ជួយប្រេង១០០លីត្រ សម្រាប់ប្រជាកសិករក្នុងឃុំស្វាយជ្រុំផងដែរ។

ក្នុងឱកាសជួបជាមួយប្រជាកសិករនោះ ឯកឧត្តមបណ្ឌិតសភាចារ្យ អ៊ុក រ៉ាប៊ុន បានសំណេះសំណាលសួរសុខទុក្ខប្រជាកសិករក្នុងឃុំស្វាយជ្រុំ និងបានចុះពិនិត្យស្រូវប្រាំងប្រជាកសិករដោយផ្ទាល់ និងបានអោយប្រជាកសិករក្នុងឃុំស្វាយជ្រុំ និងអាជ្ញាធរមូលដ្ឋាន ត្រូវខិតខំស្វះស្វែងរកទឹកសម្រាប់ស្រោចស្រពអោយបានប្រមាណ២០ថ្ងៃទៀត នឹងប្រមូលផលហើយ ។ ឯកឧត្តមក៏បានពាំនាំនូវការផ្តាំផ្ញើពីសំណាក់សម្តេចតេជោ ហ៊ុន សែន ប្រធានគណបក្សប្រជាជន និងសម្តេចធិបតី ហ៊ុន ម៉ាណែត នាយករដ្ឋមន្ត្រី ដែលសម្តេចទាំង២តែងគិតគូរដល់សុខទុក្ខបងប្អូនប្រជាពលរដ្ឋគ្រប់ទីកន្លែង ៕ ដោយ ៖ កាំង ហុងវាស្នា