ប្រធានក្រុមហ៊ុន ស៊ែមសុង អេឡិចត្រូនិច (Samsung Electronics) លោក ជេយ វ៉ាយ លី (Jay Y. Lee) ត្រូវបានរកឃើញថាមិនមានទោសកំហុស ដោយតុលាការទីក្រុងសេអ៊ូល នៅថ្ងៃច័ន្ទ (០៥ កុម្ភៈ) ក្នុងសំណុំរឿងទាក់ទងនឹងភាពមិនប្រក្រតីនៅក្នុងការរួមបញ្ចូលគ្នានៃសាខាក្រុមហ៊ុន Samsung ឆ្នាំ២០១៥ ដែលក្រុមរដ្ឋអាជ្ញាបាននិយាយថាត្រូវបានបង្កើតឡើងដើម្បីពង្រឹងការគ្រប់គ្រងរបស់លោកចំពោះក្រុមហ៊ុនបច្ចេកវិទ្យាមួយនេះ។

ក្រុមរដ្ឋអាជ្ញាបានស្នើសុំឲ្យលោកជាប់ពន្ធនាគាររយៈពេលប្រាំឆ្នាំកាលពីខែវិច្ឆិកា ឆ្នាំមុន ប៉ុន្តែលោក លី បានបដិសេធថាមិនបានធ្វើខុសទេ ដោយលើកហេតុផលថា លោក និងនាយកប្រតិបត្តិផ្សេងទៀតបានធ្វើសកម្មភាពនេះដោយជឿថាការដាក់បញ្ចូលគ្នានេះនឹងផ្តល់អត្ថប្រយោជន៍ដល់ម្ចាស់ភាគហ៊ុន។

ការជម្រះខ្លួនពីការកាត់ទោសនេះរារាំងការវិលត្រឡប់ទៅជាប់ពន្ធនាគារវិញសម្រាប់លោក លី ដែលត្រូវបានផ្តន្ទាទោសក្នុងឆ្នាំ២០១៧ ពីបទសូកប៉ាន់មិត្តភក្តិម្នាក់របស់អតីតប្រធានាធិបតីកូរ៉េខាងត្បូង លោកស្រី ផាក គុនហេ (Park Geun-hye)។

លោក លី បានជាប់ពន្ធនាគាររយៈពេល ១៨ ខែនៃការកាត់ទោស ៣០ខែ ហើយត្រូវបានលើកលែងទោសនៅឆ្នាំ២០២២ ដោយប្រធានាធិបតីបច្ចុប្បន្ន លោក យ៉ុន សុកយ៉ុល (Yoon Suk Yeol) និងរដ្ឋាភិបាល ដោយនិយាយថាប្រទេស ត្រូវការលោក លី ដើម្បីជួយយកឈ្នះលើ «វិបត្តិសេដ្ឋកិច្ចជាតិ»៕