រដ្ឋមន្ត្រីការបរទេសអូស្ត្រាលីលោកស្រី Penny Wong នៅថ្ងៃចន្ទ (ទី៥ ខែកុម្ភៈ) នេះ បាននិយាយថា ប្រទេសអូស្ត្រាលី «ហួសចិត្ត» នឹងការសម្រេចរបស់តុលាការក្រុងប៉េកាំង ក្នុងការផ្ដល់នូវការព្យួរទោសប្រហារជីវិត ចំពោះអ្នកនិពន្ធជនជាតិអូស្ត្រាលី លោក Yang Hengjun រយៈពេលប្រាំឆ្នាំ បន្ទាប់ពីរូបលោកត្រូវបានឃុំខ្លួនលើកដំបូង នៅក្នុងប្រទេសចិន។

លោកស្រី Wong បាននិយាយនៅក្នុងសេចក្តីថ្លែងការណ៍មួយថា នេះគឺជា «ដំណឹងគួរឲ្យបារម្ភ សម្រាប់លោកបណ្ឌិត Yang គ្រួសាររបស់លោក និងទាំងអស់គ្នាដែលគាំទ្ររូបលោក»។

លោក Yang ដែលជាអ្នកសរសេរប្លុកគាំទ្រលទ្ធិប្រជាធិបតេយ្យ គឺជាពលរដ្ឋអូស្ត្រាលីកើតនៅក្នុងប្រទេសចិន ដែលធ្វើការនៅទីក្រុងញូវយ៉ក មុនពេលរូបលោក ត្រូវបានចាប់ខ្លួននៅអាកាសយានដ្ឋាន Guangzhou ក្នុងឆ្នាំ២០១៩។ រូបលោកត្រូវបានចោទប្រកាន់ពីបទធ្វើចារកម្មឲ្យប្រទេស ដែលប្រទេសចិនមិនបានកំណត់អត្តសញ្ញាណជាសាធារណៈ ហើយព័ត៌មានលម្អិតនៃករណីប្រឆាំងនឹងលោក មិនត្រូវបានដឹងឡើយ។

តុលាការក្រុងប៉េកាំងបានកាត់ក្តីលោក Yang ជាសម្ងាត់ នៅក្នុងខែឧសភា ឆ្នាំ២០២១ ហើយសំណុំរឿងប្រឆាំងនឹងរូបលោកមិនដែលត្រូវបានបញ្ចេញជាសាធារណៈនោះឡើយ។ លោកបានបដិសេធថា មិនបានធ្វើជាចារកម្មឲ្យអូស្ត្រាលី ឬសហរដ្ឋអាមេរិកឡើយ។

លោក Yang បានសរសេរអំពីនយោបាយចិន និងសហរដ្ឋអាមេរិកក្នុងនាមជាអ្នកសរសេរប្លុកល្បីឈ្មោះ ហើយក៏បានសរសេររឿងប្រលោមលោកចារកម្មជាបន្តបន្ទាប់ នៅមុនការឃុំខ្លួន៕