រដ្ឋមន្ត្រីការបរទេសទួរគីលោក ហាកាន ហ្វីដា (Hakan Fidan) បាននិយាយនៅក្នុងបទសម្ភាសន៍តាមទូរទស្សន៍មួយកាលពីថ្ងៃទី៤ ខែកុម្ភៈ ដូចដែលបានរាយការណ៍ដោយសារព័ត៌មានរ៉យទ័រថា ប្រធានាធិបតីទួរគីលោក រ៉េសិប តាយីប អេរដូហ្គែន (Recep Tayyip Erdogan) និងប្រធានាធិបតីរុស្ស៊ីលោក វ្ល៉ាមៀ ពូទីន (Vladimir Putin) នឹងពិភាក្សាអំពីយន្តការថ្មីសម្រាប់ការនាំចេញគ្រាប់ធញ្ញជាតិអ៊ុយក្រែនតាមរយៈសមុទ្រខ្មៅ ក្នុងអំឡុងពេលដំណើរទស្សនកិច្ចនាពេលខាងមុខរបស់លោកពូទីនទៅកាន់ប្រទេសទួរគី។ 

ប្រព័ន្ធផ្សព្វផ្សាយរុស្ស៊ីកាលពីថ្ងៃទី២៩ មករា បានប្រកាសពីផែនការរបស់លោកពូទីនទៅបំពេញទស្សនកិច្ចនៅទួរគីក្នុងខែកុម្ភៈ។ ដំណើរទស្សនកិច្ចដែលត្រូវគ្រោងនៅថ្ងៃទី១២ ខែកុម្ភៈ គឺជាដំណើរលើកដំបូងរបស់លោក ពូទីន ទៅកាន់ប្រទេសមួយរបស់អង្គការណាតូ ចាប់តាំងពីការឈ្លានពានពេញទំហឹងរបស់រុស្ស៊ីលើអ៊ុយក្រែន ក្នុងឆ្នាំ ២០២២។

លោកហ្វីដាន បានប្រាប់ទូរទស្សន៍ A Haber ថា មេដឹកនាំទាំងពីរ នឹងពិភាក្សាអំពី «វិធីសាស្រ្តថ្មី» នៃការដឹកជញ្ជូនផលិតផលគ្រាប់ធញ្ញជាតិអ៊ុយក្រែន បន្ទាប់ពីការដករបស់ទីក្រុងមូស្គូពីគំនិតផ្តួចផ្តើមគ្រាប់ធញ្ញជាតិសមុទ្រខ្មៅ នៅក្នុងខែកក្កដាឆ្នាំ ២០២៣។

លោកបានបន្តថា៖«កិច្ចព្រមព្រៀងគ្រាប់ធញ្ញជាតិពីមុនដំណើរការនៅក្នុងយន្តការជាក់លាក់មួយ ឥឡូវនេះ វាត្រូវបានគេមើលឃើញថា មានលទ្ធភាពនៃដំណើរការជាមួយនឹងយន្តការផ្សេងគ្នា ហើយឥឡូវនេះមានការខិតខំប្រឹងប្រែង ដើម្បីបញ្ជាក់អំពីលទ្ធភាពនេះ»។

អង្គការសហប្រជាជាតិ និងទួរគី បានសម្របសម្រួលកិច្ចព្រមព្រៀងគ្រាប់ធញ្ញជាតិ នៅក្នុងខែកក្កដា ឆ្នាំ ២០២២ ដើម្បីកាត់បន្ថយវិបត្តិស្បៀងអាហារពិភពលោក ដែលបង្កឡើងដោយសង្រ្គាមពេញទំហឹងរបស់     រុស្ស៊ី។ ចាប់តាំងពីការចាកចេញជាឯកតោភាគីរបស់រុស្ស៊ីមក ទីក្រុងអង់ការ៉ា បានជួបពិភាក្សាទាំងជាមួយទីក្រុងគីវ និងទីក្រុងមូស្គូ ដោយពិភាក្សាអំពីជម្រើសសម្រាប់ការស្តារឡើងវិញ។