យោងតាមការធ្វើបច្ចុប្បន្នភាពថ្មីៗស្ដីពីជម្លោះបានអោយដឹងថា រុស្ស៊ីបានអះអាងកាលពីថ្ងៃអាទិត្យថាកងទ័ពរបស់ខ្លួន បានវាយទប់ការវាយប្រហារជាច្រើនមុខព្រួញរបស់ អ៊ុយក្រែន ខណៈអ៊ុយក្រែននិយាយថា កងទ័ពរបស់ខ្លួន បានបន្ដប្រតិបត្ដការវាយលុកជាច្រើនមុខព្រួញលើសត្រូវ។

ក្រសួងការពារជាតិរុស្ស៊ី បាននិយាយនៅក្នុងសន្និសីទសារព័ត៌មានខ្លីដែលចេញផ្សាយកាលពីថ្ងៃអាទិត្យថា កងទ័ពរបស់ខ្លួនបានវាយកម្ទេចការវាយប្រហារចំនួន៩លើករបស់កងទ័ពអ៊ុយក្រែន ដែលចេញពីមុខព្រួញជាច្រើន ដោយបានបំផ្លាញរថពាសដែក រថក្រោះអស់ជាច្រើនគ្រឿង និងកាំភ្លើងផ្លោងធុនM777 ជាច្រើនគ្រឿង និងគ្រឿងយុទ្ធោបករណ៍ជាច្រើនទៀត ព្រមទាំងឃ្លាំងស្តុកគ្រាប់រំសេវមួយកន្លែង និងឃ្លាំងស្ដុកប្រេង ឥន្ធនៈ១កន្លែងផងដែរ។

ក្រសួងការពារជាតិ ក៏បាននិយាយផងដែរថា កងទ័ពអាកាសរុស្ស៊ី បានបាញ់ទម្លាក់យានដ្រូនពីខាងភាគីអ៊ុយក្រែនចំនួន៩៧គ្រឿង។

នៅថ្ងៃជាមួយគ្នានេះដែរ អគ្គសេនាធិការកងទ័ពអ៊ុយក្រែន បានអះអាងថា រយៈពេល២៤ម៉ោងកន្លង

ទៅនេះ ការប៉ះទង្គិចគ្នាចំនួន៥៩លើកបានកើតឡើងនៅសមរភូមិជាច្រើន ហើយកងទ័ពអ៊ុយក្រែន បានបន្ដប្រតិបត្ដការវាយលុករបស់ខ្លួននៅ៦មុខព្រួញ ដោយបានបំផ្លាញកាំភ្លើងធំ១ដើម មីស៊ីលប្រភេទ KH-59មួយ ដើមនិងយានដ្រូនចំនួន១៣គ្រឿង៕