កំពង់ស្ពឺ ៖ ក្រុមការងារគ្រូពេទ្យស្ម័គ្រចិត្ត ហ៊ុន ម៉ានី ចំនួន១៣០នាក់ បន្តចុះពិនិត្យព្យាបាលជំងឺ វះកាត់តូច ចែកឱសថ និងចាក់វ៉ាក់សាំងបង្ការជំងឺកូវីដ-19 ពីដូសទី១ រហូតដល់ដូសទី៦ ជូនប្រជាពលរដ្ឋរស់នៅតំបន់ដាច់ស្រយាល ដោយឥតគិតថ្លៃ បានចំនួន៨២៩នាក់ នៅឃុំហោងសំណំ ស្រុកឱរ៉ាល់ ខេត្តកំពង់ស្ពឺ។

​សកម្មភាពសប្បុរសធម៌នេះដឹកនាំដោយឯកឧត្តមបណ្ឌិត កែរ រដ្ឋា រដ្ឋលេខាធិការក្រសួងសុខាភិបាល និងជាអនុប្រធានប្រតិបត្តិក្រុមការងារគ្រូពេទ្យស្ម័គ្រចិត្តឯកឧត្តម ហ៊ុន ម៉ានី តំណាងឯកឧត្តម លេង ផាលី ប្រធានប្រតិបត្តិក្រុមការងារគ្រូពេទ្យស្ម័គ្រចិត្ត ហ៊ុន ម៉ានី និងលោកជំទាវ ហង់ លីណា លោកវេជ្ជបណ្ឌិត សាយ ឫទ្ធី ឯកឧត្តមវេជ្ជបណ្ឌិត អោ វ៉ាន់ថេន ឯកឧត្តម ភឿន កុសល ជាអនុប្រធានប្រតិបត្តិក្រុមការងារគ្រូពេទ្យស្ម័គ្រចិត្តឯកឧត្តម ហ៊ុន ម៉ានី បាន​នាំយកអំណោយថ្នាំពេទ្យដ៏ថ្លៃថ្លារបស់ឯកឧត្តម ហ៊ុន ម៉ានី ប្រធានកិត្តិយសក្រុមការងារគ្រូពេទ្យស្ម័គ្រចិត្ដឯកឧត្តម ហ៊ុន ម៉ានី ដោយសហការជាមួយឯកឧត្តមវេជ្ជបណ្ឌិត ហុក គ្រី អនុប្រធានប្រតិបត្តិទទួលបន្ទុកប្រធានប្រតិបត្តិក្រុមការងារគ្រូពេទ្យស្ម័គ្រចិត្ត ហ៊ុន ម៉ានី ខេត្តកំពង់ស្ពឺ និងជាប្រធានមន្ទីរសុខាភិបាលខេត្តកំពង់ស្ពឺ មន្ទីរពេទ្យខេត្តកំពង់ស្ពឺ ក្រុមការងារគ្រូពេទ្យ វះកាត់តូច នៃមន្ទីរសុខាភិបាលខេត្តស្វាយរៀង លោក ងួន វាសនា អភិបាលស្រុកឱរ៉ាល់ សហភាពសហព័ន្ធយុវជនកម្ពុជា និងអាជ្ញាធរឃុំ-ស្រុកដែលពាក់ព័ន្ធ, កាលពីថ្ងៃទី៤ ខែកុម្ភៈ ឆ្នាំ២០២៤។

ឯកឧត្តមបណ្ឌិត កែរ រដ្ឋា បានថ្លែងថា ក្នុងរយៈពេល១២ឆ្នាំ (២ ធ្នូ ២០១២ ដល់ ៤ កុម្ភៈ ២០២៤) ក្រោមការដឹកនាំដោយផ្ទាល់របស់ឯកឧត្តម ហ៊ុន ម៉ានី ប្រធានសហភាពសហព័ន្ធយុវជនកម្ពុជា និងជាប្រធានកិត្តិយសក្រុមការងារគ្រូពេទ្យស្ម័គ្រចិត្តឯកឧត្តម ហ៊ុន ម៉ានី ដែលមានក្រុមគ្រូពេទ្យចំនួន១២,០៦៩នាក់ ក្នុងនោះស្ត្រីមានចំនួន៦,៤៩៥នាក់ ដឹកនាំសម្របសម្រួលដោយឯកឧត្តម លេង ផាលី បានបំពេញបេសកកម្មទទួលបានលទ្ធផលប្រកបដោយប្រសិទ្ធភាព និងប្រសិទ្ធផលជាច្រើនឥតគណនា ក្នុងការចូលរួមអប់រំផ្សព្វផ្សាយ ចាក់វ៉ាក់សាំងបង្ការកូវីដ-១៩ ក្នុងក្របខណ្ឌទូទាំងប្រទេស បណ្តុះបណ្តាលវគ្គសង្គ្រោះបឋម យកសំណាករកវីរុសកូវីដ-១៩ និងពិនិត្យព្យាបាលជំងឺ និងផ្តល់សេវាជូនប្រជាពលរដ្ឋដោយឥតគិតថ្លៃ និងមិនគិតនិន្នាការនយោបាយជាតិ សាសន៍ឡើយ ក្នុង២៥រាជធានី-ខេត្ត បានចំនួន១៨២៥លើក ក្នុងនោះពិនិត្យព្យាបាលជំងឺ និងផ្តល់សេវាជូនប្រជាពលរដ្ឋបានចំនួន១៣,១៥៧,០៧៧នាក់ ​ ក្នុងនោះស្ត្រីមានចំនួន៦,៧៣១,២៥៦នាក់។

ចំណែកឯកឧត្តមវេជ្ជបណ្ឌិត ហុក គ្រី បានឲ្យដឹងថា ក្រុមការងារគ្រូពេទ្យស្ម័គ្រចិត្តឯកឧត្តម ហ៊ុន ម៉ានី ទាំងថ្នាក់ជាតិ និងថ្នាក់ខេត្តកំពង់ស្ពឺ ក្នុងស្រុកឱរ៉ាល់ សរុបមកចុះពិនិត្យព្យាបាលជំងឺជូនប្រជាពលរដ្ឋ នៅក្នុងក្របខណ្ឌទូទាំងខេត្តកំពង់ស្ពឺ សរុបចំនួន២៨១លើក។ ដោយឡែកនៅស្រុកឱរ៉ាល់ បានចំនួន១៨១លើក សរុបបានផ្តល់សេវាជូនប្រជាពលរដ្ឋបានចំនួន ១,២៦១,៦០២នាក់-ដង​ ក្នុងនោះស្ត្រីមានចំនួន ៦៨៨,៨៦១នាក់-ដង។ ​

លោកស្រី សេង ចំរុង អភិបាលរងស្រុកឱរ៉ាល់ និងប្រជាពលរដ្ឋក្មេង ចាស់ ប្រុស ស្រី ពិតជាសប្បាយរីករាយខ្លាំងណាស់ ដែលក្រុមការងារគ្រូពេទ្យស្ម័គ្រចិត្តឯកឧត្តម ហ៊ុន ម៉ានី ចុះមកព្យាបាលជំងឺជូនប្រជាពលរដ្ឋនៅក្នុងទឹកដីស្រុកឱរ៉ាល់ជាញឹកញាប់។​

សូមបញ្ជាក់ផងដែរថា ក្រុមការងារគ្រូពេទ្យស្ម័គ្រចិត្តឯកឧត្តម ហ៊ុន ម៉ានី ចំនួន៤,៦០១នាក់ កំពុងស្ម័គ្រចិត្តចុះបេសកកម្មតាមការឧទ្ទេសនាមរបស់គណៈកម្មកាចំពោះកិច្ចចាក់វ៉ាក់សាំងបង្ការជំងឺកូវីដ-១៩ ក្នុងក្រប​     ខណ្ឌទូទាំងប្រទេស ដោយឥតគិតថ្លៃ និងឥតគិតថវិកា គិតតាំងពីចាប់ផ្តើមដំបូងពីថ្ងៃទី២៣ ខែកុម្ភៈ ឆ្នាំ២០២១ មកដល់បច្ចុប្បន្នបានចាក់វ៉ាក់សាំងជូនប្រជាពលរដ្ឋតាមមូលដ្ឋាននានាក្នុង២៥រាជធានី-ខេត្ត បានចំនួន១១,៨៩០,១៦៤ដូស។ នាឱកាសនោះឯកឧត្តមវេជ្ជបណ្ឌិត កែរ រដ្ឋា លោកជំទាវ ហង់ លីណា និងលោកវេជ្ជបណ្ឌិត សាយ ឬទី្ធ បានឧបត្ថម្ភថវិកាចំនួន៦០ម៉ឺនរៀល ជូនអ៊ុំស្រី កើតជំងឺមហារីកសុដន់ សម្រាប់ធ្វើដំណើរ ទៅពិនិត្យព្យាបាលជំងឺនៅមន្ទីរពេទ្យថ្នាក់ជាតិផងដែរ៕ អត្ថបទ៖ រដ្ឋា