ប្រណាំង​កង់៖ អ្នកការពារ​តំណែង​ជើងឯក Tour de France កីឡាករ​ស្លូ​វេ​នី Tadej Pogacar បាន​ប្រជែង​ឈ្នះ​ដំណាក់កាល​ទី៥ នៃ​ព្រឹត្តិការណ៍ Grand Tour, Tour de France ថ្ងៃ​ពុធ​ម្សិលមិញ ខណៈ​កីឡាករ​ហូ​ឡង់ Mathieu van der Poel នៅតែ​បន្ត​នាំមុខ​ក្នុង​តារាង​រួម​ដដែល​។

​​ដំណាក់កាល​ទី៥ ដែលមាន​ចំងាយ​ផ្លូវ​ត្រឹម ២៧.២​គីឡូម៉ែត្រ ជា​ដំណាក់កាល​ប្រណាំង​យក​ថេរវេលា​ផ្ទាល់ខ្លួន​ ហើយកីឡាករ Tadej Pogacar របស់​ក្រុម UAE Team Emirate ធ្វើ​បានល្អ​ជាងគេ​ជាមួយនឹង​ថេរវេលា ៣២នាទី​គត់ តាម​ពីក្រោយ​ដោយ​កីឡាករ​ស្វ៊ី​ស Stefan Kung របស់​ក្រុម FDJ យឺត​ជាង ១៩វិនាទី និង​លេខ៣ កីឡាករ​ដា​ណឺ​ម៉ាក Jonas Vingegaard យឺត​ជាង ២៧វិនាទី​។ ជ័យជំនះ​របស់ Tadej Pogacar ធ្វើ​អោយគេ​ឡើងមក​លេខ២ ក្នុង​តារាង​រួម​យឺត​ជា​អ្នក​នាំមុខ ៨វិនាទី​។ ​កីឡាករ​ហូ​ឡង់ Mathieu van der Poel នៅតែ​បន្ត​នាំមុខគេ​ដដែល ​បន្ទាប់ពី​បញ្ចប់​ដំណាក់កាល​ទី៥ នេះ​នៅ​ចំណាត់ថ្នាក់​លេខ៥​។ ​សំរាប់​ដំណាក់កាល​ទី៦ ថ្ងៃ​ព្រហស្បតិ៍​នេះ​មាន​ចំងាយ​ផ្លូវ ១៦០.៦​គីឡូម៉ែត្រ ជា​ដំណាក់កាល​ប្រណាំង​លើ​ស្ថានភាព​ផ្លូវ​រាបស្មើ​ធម្មតា​៕

​អត្ថបទ​៖​នាង សុភា​វុ​ធ