ប្រភពការទូតបារាំងមួយបានប្រាប់ឲ្យដឹងថា ប្រទេសបារាំងនឹងកោះអញ្ជើញឯកអគ្គរដ្ឋទូតរុស្ស៊ី នៅថ្ងៃចន្ទ(ទី៥ ខែកុម្ភៈ) នេះ ក្រោយបុគ្គលិកមនុស្សធម៌បារាំង ២នាក់ បានសម្លាប់ បន្ទាប់ពីមានការវាយប្រហាររបស់រុស្ស៊ី នៅអ៊ុយក្រែន កាលពីសប្តាហ៍មុន និងក្រោយពីអ្វីដែលទីក្រុងប៉ារីសបាននិយាយថា ជាការកើនឡើងនូវព័ត៌មានមិនពិតរបស់រុស្ស៊ីដែលដាក់គោលដៅលើប្រទេសបារាំង។

សូមបញ្ជាក់ថា បុគ្គលិកជំនួយស្ម័គ្រចិត្តបារាំង ២នាក់ បានស្លាប់ ហើយ ៣នាក់ផ្សេងទៀតរងរបួស ក្នុងការវាយប្រហារដោយយានដ្រូនរបស់រុស្ស៊ី នៅតំបន់ Kherson ភាគខាងត្បូងអ៊ុយក្រែន កាលពីថ្ងៃទី១ ខែកុម្ភៈ ជាអ្វីដែលរដ្ឋមន្ត្រីការបរទេស លោក Stephane Sejourne ពិពណ៌នាថា ជាទង្វើ «ព្រៃផ្សៃ»។

ប្រភពការទូតបាននិយាយថា៖ «បារាំងនឹងអះអាងជាថ្មីម្ដងទៀតនូវការថ្កោលទោស ចំពោះការវាយប្រហាររបស់រុស្ស៊ី»។ ប្រភពដដែលនោះបានបន្ថែមថា៖ «ប្រទេសបារាំងក៏នឹងបរិហារផងដែរ ចំពោះការការកើនឡើងនូវព័ត៌មានមិនពិតដែលដាក់គោលដៅលើប្រទេសបារាំង»៕