វិទ្យាស្ថានដើម្បីការសិក្សាពីសង្គ្រាម (ISW) បានវិភាគសេចក្តីថ្លែងការណ៍របស់រុស្ស៊ីក្នុងការគាំទ្រអ៊ីរ៉ង់ បន្ទាប់ពីសហរដ្ឋអាមេរិកបានធ្វើការវាយប្រហារលើក្រុមសកម្មប្រយុទ្ធដែលគាំទ្រអ៊ីរ៉ង់។

វិទ្យាស្ថាន ISW បានបង្ហាញថា វិមានក្រឹមឡាំង កំពុងបង្កើនការគាំទ្ររបស់ខ្លួនទ្វេដងសម្រាប់អ៊ីរ៉ង់ ខណៈដែលសហរដ្ឋអាមេរិក កំពុងបើកការវាយប្រហារ ដើម្បីរារាំងក្រុមសកម្មប្រយុទ្ធដែលគាំទ្រដោយអ៊ីរ៉ង់នៅក្នុងប្រទេសអ៊ីរ៉ាក់ ស៊ីរី និងយេម៉ែនពីការវាយប្រហារលើសហរដ្ឋអាមេរិក និងគោលដៅផ្សេងទៀត។

ក្រសួងការបរទេសរុស្ស៊ី បានថ្កោលទោសចំពោះការវាយប្រហារសងសឹករបស់សហរដ្ឋអាមេរិកប្រឆាំងនឹងកងជីវពលដែលគាំទ្រដោយអ៊ីរ៉ង់ នៅក្នុងប្រទេសអ៊ីរ៉ាក់ ស៊ីរី និងយេម៉ែន ដែលបានធ្វើឡើង កាលពីថ្ងៃទី៣ ខែកុម្ភៈ។

អ្នកស្រី ម៉ារៀ ហ្សាខារ៉ូវ៉ា (Maria Zakharova) អ្នកនាំពាក្យក្រសួងការបរទេសរុស្ស៊ី បានថ្កោលទោសការវាយប្រហារនេះថា ជា «ទង្វើដ៏ច្បាស់នៃការឈ្លានពានរបស់អាមេរិក-អង់គ្លេស ហើយបានអះអាងថា ពួកគេបានបង្ហាញពី «លក្ខណៈឈ្លានពានរបស់គោលនយោបាយអាមេរិក» និង «ការមិនគោរពទាំងស្រុងចំពោះច្បាប់អន្តរជាតិ»។

អ្នកស្រីហ្សាខារ៉ូវ៉ា បានអះអាងថា ការវាយប្រហារតាមអាកាសរបស់អាមេរិកគឺ «រៀបចំជាពិសេស» ដើម្បីបង្កជម្លោះនៅមជ្ឈិមបូព៌ា។

លើសពីនេះទៀត អ្នកស្រីបានរិះគន់ចក្រភពអង់គ្លេសចំពោះការចូលរួមរបស់ខ្លួន នៅក្នុងការវាយប្រហារតាមអាកាស ហើយបានអះអាងថា ចក្រភពអង់គ្លេស «មិនទាន់ឆ្លើយតប» ចំពោះ«កិច្ចប្រឹងប្រែង » របស់ខ្លួនក្នុងការគាំទ្រគោលនយោបាយបង្កហេតុរបស់សហរដ្ឋអាមេរិក។