សហភាពអាហ្វ្រិក (AU) បាននិយាយថា ប្រទេសសេណេហ្គាល់គួរតែរៀបចំការបោះឆ្នោតប្រធានាធិបតីឲ្យបានឆាប់តាមដែលអាចធ្វើទៅបាន ដែលការលើកឡើងនេះកើតមានប៉ុន្មានថ្ងៃបន្ទាប់ពីប្រធានាធិបតីរបស់ប្រទេសនេះ លោក Macky Sall បានពន្យារពេលការបោះឆ្នោតពីថ្ងៃទី២៥ ខែកុម្ភៈ ទៅដល់កាលបរិច្ឆេទមួយដែលមិនត្រូវបានបញ្ជាក់។

ប្រទេសសេណេហ្គាល់មិនធ្លាប់បានពន្យារពេលការបោះឆ្នោតប្រធានាធិបតីនោះឡើយ ហើយការប្រកាសរបស់លោក Sall កាលពីថ្ងៃសៅរ៍ (ទី៣ ខែកុម្ភៈ) បានធ្វើឲ្យប្រទេសនេះក្លាយជាដែនដីថ្មីតាមរដ្ឋធម្មនុញ្ញ ដែលក្រុមប្រឆាំង និងសង្គមស៊ីវិលមួយចំនួនបាននិយាយថា ស្មើនឹង «រដ្ឋប្រហារតាមស្ថាប័ន»។

ប្រធានគណៈកម្មការ AU លោក Moussa Faki Mahamat បាននិយាយនៅក្នុងសេចក្តីថ្លែងការណ៍មួយកាលពីល្ងាចថ្ងៃអាទិត្យ (ទី៤ ខែកុម្ភៈ) ថា ប្រទេសសេណេហ្គាល់គួរតែ «រៀបចំការបោះឆ្នោតឲ្យបានឆាប់តាមដែលអាចធ្វើទៅបាន ដោយតម្លាភាព សន្តិភាព និងសុខដុមរមនាជាតិ»។

សេចក្តីថ្លែងការណ៍នោះបានបន្ថែមថា៖ «ខ្លួន (AU) សូមជំរុញយ៉ាងខ្លាំងក្លាដល់កម្លាំងនយោបាយ និងសង្គមទាំងអស់ឲ្យដោះស្រាយជម្លោះនយោបាយតាមរយៈការពិភាក្សា ការយោគយល់ និងការសន្ទនាដែលមានលក្ខណៈកែលម្អ»។

សូមបញ្ជាក់ថា បើយោងតាមអត្ថបទនៃសេចក្ដីស្នើច្បាប់ដែលត្រូវបានឃើញដោយសារព័ត៌មាន Reuters បានឲ្យដឹងថា សមាជិកសភានៃប្រទេសសេណេហ្គាល់គ្រោងនឹងពិភាក្សា នៅថ្ងៃចន្ទ (ទី៥ ខែកុម្ភៈ) នេះ លើសំណើរៀបចំការបោះឆ្នោត នាថ្ងៃទី២៥ ខែសីហា ហើយឲ្យលោក Sall បន្តកាន់អំណាចរហូតដល់អ្នកស្នងតំណែងរបស់លោក ត្រូវបានតែងតាំង៕