​​បាល់ទាត់៖ ​ក្លិប Everton បានប្រកាស​ជា​ផ្លូវការ​ពី​ការតែងតាំង​អ្នកចាត់ការ​ថ្មី​លោក Rafael Benitez បន្ទាប់ពី​ការចរចា​អស់ពីរ​សប្តាហ៍​កន្លងមក​។ ​អ្នកចាត់ការ​សញ្ជាតិ​អេ​ស្ប៉ា​ញ​រូបនេះ​បាន​ចុះហត្ថលេខា ៣ឆ្នាំ​ដឹក​នាំនៅ Goodison Park បន្ត​តំណែង​ពី​លោក Carlo Ancelotti ដែល​ចាកចេញ​ទៅកាន់ Real Madrid​។​

​​មុននឹង​ឈានដល់​កិច្ចព្រមព្រៀង​នេះ Rafael Benitez និង Everton បាន​ចរចា​គ្នា​អស់​រយៈពេល ២សប្តាហ៍​ហើយឆ្លងកាត់​ឧបសគ្គ​មួយចំនួន​ ដូចជា​ការមិន​ពេញចិត្ត​ពី​អ្នកគាំទ្រ Everton មួយចំនួន​ដែល​មិន​ចង់បាន​អតីត​អ្នកចាត់ការ​ របស់ក្រុម​គូប្រជែង​ក្នុង​ទីក្រុង​ជាមួយ Liverpool មក​ដឹកនាំ​។ ​អ្នកគាំទ្រ​មួយចំនួន​ក៏​មិន​សប្បាយ​ចិត្តនឹង​បុរស​វ័យ ៦១ឆ្នាំ​រូបនេះ​ដែល​ធ្លាប់បាន​និយាយ​មើល​ងាយ Everton ថា ​ជា​ក្លិប​តូចតាច​មួយ​អំឡុងពេល​លោក​ដឹកនាំ Liverpool កាលពី​ឆ្នាំ២០០៧​។

​​តាំងពី​ចាកចេញ​ពី Liverpool នៅ​ឆ្នាំ២០១០ លោក Benitez នៅតែ​រក្សា​ផ្ទះ​របស់លោក​នៅ Merseyside នៅឡើយ​ ហើយ​ក្រុមគ្រួសារ​របស់លោក​នៅតែ​បន្ត​រស់នៅ​មកដល់ពេលនេះ​។ រំលឹកថា​លោក Rafael Benitez ធ្លាប់​ដឹកនាំ Liverpool គ្រង​ជើងឯក UEFA Champions League ក្នុង​រយៈពេល ៦ឆ្នាំ​នៃ​អាជីព​នៅ Anfield ហើយ​លោក​ក៏​ធ្លាប់​ដឹកនាំ​ក្លិប​អង់គ្លេស​ផ្សេងទៀត​ដែរ​រួមមាន Chelsea និង Newcastle ហើយក៏​ធ្លាប់​ចំណាយពេល ១៨ខែ​ដឹក​នាំនៅ​ក្របខណ្ឌ Chinese Super League ផងដែរ​៕

​អត្ថបទ​៖​នាង សុភា​វុ​ធ