រយៈពេល ១ឆ្នាំ ចាប់តាំងពីការរញ្ជួយដីសម្លាប់មនុស្សដែលបានវាយប្រហារប្រទេសស៊ីរី និងទួរគី លោក Amer Mohammed Haleel និងក្រុមគ្រួសាររបស់លោក បន្តរស់នៅក្នុងជំរំបណ្តោះអាសន្ន បន្ទាប់ពីការរញ្ជួយដីនេះ បានបំផ្លិចបំផ្លាញផ្ទះរបស់លោកនៅទីក្រុង Jandaris ប្រទេសស៊ីរី ។

គ្រោះមហន្តរាយស្លាប់មនុស្សច្រើនបំផុតនៅក្នុងប្រវត្តិសាស្រ្តនាសម័យទំនើបរបស់ទួរគី ដែលជាការរញ្ជួយកម្រិត ៧,៨រ៉ិចទ័រ បានអង្រួនទីក្រុងតូច-ធំនៅភាគអាគ្នេយ៍ប្រទេសទួរគី និងប្រទេសជិតខាងស៊ីរី ។

ការរញ្ជួយដីនេះដែរ បានសម្លាប់មនុស្សជាង ៥ម៉ឺននាក់នៅប្រទេសទួរគី និងប្រហែល ៥.៩០០នាក់ នៅប្រទេសស៊ីរី ហើយនិងធ្វើឲ្យមនុស្ស ១លាននាក់ផ្សេងទៀត គ្មានផ្ទះសម្បែងរស់នៅ ។

លោក Haleel បច្ចុប្បន្នមានវ័យ ៥០ឆ្នាំ និយាយថា គ្មាននរណាម្នាក់ជួយគាត់ ឬគ្រួសាររបស់គាត់ឡើយ បន្ទាប់ពីការរញ្ជួយដី ។

ដោយឡែក លោក Sheikh Barakat វ័យ ៦០ឆ្នាំ គឺជាពលរដ្ឋរស់នៅក្នុងទីក្រុង Jandaris និងលោក Abu Daoud វ័យ ៥០ឆ្នាំ បានឈរនៅជិតគ្នា ពេលដែលពួកគេសំឡឹងមើលផ្ទះគ្មានមនុស្សរស់នៅរបស់ពួកគេ ។

សម្រាប់រយៈពេល ១ឆ្នាំកន្លងមកនេះ ពួកគេទាំង ២នាក់ រស់នៅក្នុងសំពត់តង់ ដែលពួកគេដំឡើងនៅលើដីទំនេរជិតផ្ទះរបស់ពួកគេ ៕