ព្រះបរមរាជវាំង បាក់ឃីងហែម (Buckingham) បានឲ្យដឹងកាលពីថ្ងៃចន្ទ (០៥ កុម្ភៈ) ថាព្រះមហាក្សត្រនៃចក្រភពអង់គ្លេស ព្រះអង្គ ឆាលស៍ (Charles) ត្រូវបានគេធ្វើរោគវិនិច្ឆ័យថាទ្រង់មានទម្រង់នៃជំងឺមហារីក ហើយនឹងពន្យារពេលការបង្ហាញព្រះវត្តមានជាសាធារណៈ ដើម្បីទទួលការព្យាបាល ប៉ុន្តែបានបន្ថែមថា ទ្រង់នៅតែមានស្ថានភាព «វិជ្ជមានទាំងស្រុង» ជុំវិញការភ័យខ្លាចនៃការគ្រងរាជ្យតិចជាងរយៈពេល ១៨ ខែនៅក្នុងរជ្ជកាលរបស់ទ្រង់។
ព្រះបរមរាជវាំងបានបន្តថា ព្រះមហាក្សត្រ ឆាលស៍ ដែលមានព្រះជន្ម ៧៥ ព្រះវស្សា និងបានឡើងសោយរាជ្យក្នុងខែកញ្ញា ឆ្នាំ២០២២ បន្ទាប់ពីការសោយព្រះពិរាល័យរបស់ព្រះមាតាទ្រង់ គឺព្រះមហាក្សត្រី អេលីហ៊្សាបេត (Elizabeth) បានចាប់ផ្តើមការព្យាបាលជាបន្តបន្ទាប់ ដោយបន្ថែមថាព្រះអង្គទន្ទឹងរង់ចាំការវិលត្រឡប់មកបំពេញព្រះរាជកិច្ចឱ្យបានឆាប់តាមដែលអាចធ្វើទៅបាន។
ការលាតត្រដាងនៃជំងឺមហារីកនេះ កើតឡើងបន្ទាប់ពីព្រះអង្គ ឆាលស៍ បានចំណាយពេលបីយប់នៅក្នុងមន្ទីរពេទ្យកាលពីខែមុន ជាទីដែលទ្រង់បានធ្វើការវះកាត់ដោយសារស្ថានភាពក្រពេញប្រូស្តាតរីកធំ។
ព្រះរាជវាំងដដែលនេះបានបន្ថែមថា បញ្ហានៃក្តីបារម្ភដាច់ដោយឡែកមួយត្រូវបានគេប្រទះឃើញក្នុងអំឡុងពេលស្នាក់នៅមន្ទីរពេទ្យនោះ ប៉ុន្តែមិនបានផ្តល់ព័ត៌មានលម្អិតណាមួយទេ ដោយគ្រាន់តែឲ្យដឹងថាការធ្វើតេស្តបានបង្ហាញថាព្រះអង្គមាន «ទម្រង់នៃជំងឺមហារីក» ប៉ុណ្ណោះ៕
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
