ក្រុមមន្ត្រីក្នុងប្រទេសបង់ក្លាដែសបាននិយាយកាលពីថ្ងៃចន្ទ ទី ៥ ខែកុម្ភៈ ថា យ៉ាងហោចណាស់ឆ្មាំព្រំដែនមីយ៉ាន់ម៉ាចំនួន៩៥នាក់ ដែលខ្លះបានរងរបួស បានភៀសខ្លួនទៅកាន់ប្រទេសបង់ក្លាដែសក្នុងរយៈពេលប៉ុន្មានថ្ងៃចុងក្រោយនេះ ស្របពេលមានការប្រយុទ្ធគ្នាកាន់តែខ្លាំងក្លារវាងកងកម្លាំងឧទ្ទាមនៅក្នុងសហភាពមីយ៉ាន់ម៉ា និងរបបសឹក។

មនុស្សយ៉ាងហោចណាស់ពីរនាក់បានស្លាប់នៅក្នុងប្រទេសបង់ក្លាដែសកាលពីថ្ងៃចន្ទ បន្ទាប់ពីគ្រាប់កាំភ្លើងត្បាល់បានបាញ់ចេញពីសហភាពមីយ៉ាន់ម៉ាអំឡុងការប៉ះទង្គិចឆ្លងកាត់ព្រំដែននៅទីនោះ។     

ចាប់តាំងពីមានរដ្ឋប្រហារប្រឆាំងរដ្ឋាភិបាលជាប់ឆ្នោតក្នុងឆ្នាំ២០២១ របបយោធាកំពុងប្រឈមនឹងបញ្ហាដ៏ធំបំផុត ដោយព្យាយាមទប់ស្កាត់ការបះបោរដ៏បង្ហូរឈាម ដែលត្រូវគេមើលឃើញថាក្រុមប្រឆាំងរបបសឹក គាំទ្រដោយរដ្ឋាភិបាលគាំទ្រលទ្ធិប្រជាធិបតេយ្យបានដណ្តើមកាន់កាប់ទីតាំងយោធា និងទីប្រជុំជនជាច្រើន។

គេបានលឺស្នូរគ្រាប់កាំភ្លើងពីខាងព្រំដែនមីយ៉ាន់ម៉ាក្នុងសង្កាត់ទេសចរណ៍ ខូកបាសារ (Cox's Bazar) ភាគអាគ្នេយ៍របស់ប្រទេសបង់ក្លាដែស ជាទីដែលសមាជិកជិតមួយលាននាក់នៃជនជាតិភាគតិចមូស្លីមមកពីមីយ៉ាន់ម៉ារស់នៅក្នុងជំរំខ្ទមឬស្សីនិងផ្លាស្ទិក បន្ទាប់ពីបានភៀសខ្លួនពីការបង្ក្រាបដោយយោធានៅទីនោះកាលពីឆ្នាំ២០១៧ ។ 

លោកសារីហ្វាល់ អ៊ីស្លាម( Shariful Islam) អ្នកនាំពាក្យរបស់ឆ្មាំព្រំដែនបង់ក្លាដែសបាននិយាយកាលពីថ្ងៃចន្ទថាសមាជិកនគរបាលការពារព្រំដែនមីយ៉ាន់ម៉ា (BGP) បានចូលទៅក្នុងប្រទេសបង់ក្លាដែសដោយមានអាវុធជាប់នឹងដៃ ហើយ១៥ នាក់ក្នុងចំណោមពួកគេមានរបួសដោយគ្រាប់កាំភ្លើងនៅពេលពួកគេឆ្លងកាត់ព្រំដែនដោយលោកបានបន្ថែមថាអ្នករងរបួសទាំងនោះត្រូវបានទទួលការព្យាបាលនៅមន្ទីរពេទ្យផ្សេងៗគ្នា។ទីភ្នាក់ងារជំនួយវេជ្ជបណ្ឌិតគ្មានព្រំដែន (MSF) បាននិយាយថា ពួកគេបានព្យាបាលមនុស្ស១៧នាក់ដែលរងរបួសនៅក្នុងការប៉ះទង្គិចគ្នាកាលពីថ្ងៃអាទិត្យ បន្ទាប់ពីការប្រយុទ្ធគ្នានៅព្រំដែនបង់ក្លាដែស និងមីយ៉ាន់ម៉ា៕