ប្រទេសរុស្ស៊ី បានចោទប្រកាន់ ប្រធានាធិបតីសហរដ្ឋអាមេរិក លោក Joe Biden កាលពីថ្ងៃចន្ទ ពីការវាយប្រហារនៅក្នុងប្រទេសអ៊ីរ៉ាក់ និងស៊ីរី ដើម្បីលើកមុខមាត់របស់លោក ខណៈយុទ្ធនាការបោះឆ្នោតប្រធានាធិបតី «កំពុងឡើងកម្តៅ» ពុំមែនជាការសងសឹកចំពោះការវាយប្រហារដ៏ឃោឃៅលើទាហានអាមេរិកនោះទេ។ សហរដ្ឋអាមេរិក បានចាប់ផ្តើមការវាយប្រហារតាមអាកាស ទៅលើគោលដៅរាប់សិបកន្លែងដែលមានទំនាក់ទំនងជាមួយកងឆ្មាំបដិវត្តន៍អ៊ីរ៉ង់និងក្រុមសម្ព័ន្ធមិត្ត បន្ទាប់ពីទាហានអាមេរិក៣នាក់ ត្រូវបានសម្លាប់នៅក្នុងប្រទេសហ្ស៊កដានី ក្នុងការវាយប្រហារដែលទីក្រុងវ៉ាស៊ីនតោន បានដាក់កំហុសលើកងជីវពលគាំទ្រដោយអ៊ីរ៉ង់។

ឯកអគ្គរដ្ឋទូតរុស្ស៊ីប្រចាំអង្គការសហប្រជាជាតិ លោក Vassily Nebenzia នៅក្នុងកិច្ចប្រជុំក្រុមប្រឹក្សាសន្តិសុខ ស្តីពីការវាយប្រហារដែលត្រូវបានស្នើឡើងដោយទីក្រុងមូស្គូ បាននិយាយថា ពុំមានហេតុផលត្រឹមត្រូវសម្រាប់សកម្មភាពរបស់សហរដ្ឋអាមេរិកនោះទេ។ អ្នកបោះឆ្នោតសហរដ្ឋអាមេរិកនឹងទៅបោះឆ្នោតនៅខែវិច្ឆិកា ដើម្បីជ្រើសរើសប្រធានាធិបតីសម្រាប់រយៈពេល ៤ ឆ្នាំបន្ទាប់។ ឯកអគ្គរដ្ឋទូតរងសហរដ្ឋអាមេរិក ប្រចាំអង្គការសហប្រជាជាតិ លោក Robert Wood បានបង្ហាញពីហេតុផលត្រឹមត្រូវចំពោះការវាយប្រហាររបស់សហរដ្ឋអាមេរិកនៅក្នុងប្រទេសស៊ីរី និងអ៊ីរ៉ាក់ ក្រោមមាត្រា ៥១ នៃការបង្កើតធម្មនុញ្ញអង្គការសហប្រជាជាតិ ដែលគ្របដណ្តប់លើសិទ្ធិបុគ្គល ឬសមូហភាពរបស់រដ្ឋនានាចំពោះសិទ្ធិស្វ័យការពារប្រឆាំងការវាយប្រហារប្រដាប់អាវុធ។ លោក បានបញ្ជាក់ថា សហរដ្ឋអាមេរិក គ្មានបំណងឲ្យមានជម្លោះបន្ថែមទៀតនៅក្នុងតំបន់ នៅពេលដែលយើងកំពុងធ្វើការយ៉ាងសកម្មដើម្បីទប់ស្កាត់ និងកាត់បន្ថយជម្លោះនៅតំបន់ហ្កាហ្សា ហើយយើងមិនស្វែងរកជម្លោះដោយផ្ទាល់ជាមួយប្រទេសអ៊ីរ៉ង់នោះទេ ប៉ុន្តែយើងនឹងបន្តការពារបុគ្គលិករបស់យើងប្រឆាំងការវាយប្រហារដែលមិនអាចទទួលយកបាន។ លោកនិយាយថា ការវាយប្រហារនៅក្នុងប្រទេសស៊ីរី និងអ៊ីរ៉ាក់ គឺជាប្រតិបត្តិការ ដាច់ដោយឡែក ពីការវាយប្រហាររបស់សហរដ្ឋអាមេរិក និងចក្រភពអង់គ្លេស ប្រឆាំងក្រុមហ៊ូទី សម្ព័ន្ធមិត្តអ៊ីរ៉ង់ នៅក្នុងប្រទេសយេម៉ែន ដើម្បីឆ្លើយតបទៅនឹងក្រុមហ៊ូទី ដែលកំណត់គោលដៅលើការដឹកជញ្ជូននៅក្នុងសមុទ្រក្រហម៕