មន្ត្រីនៃពន្ធនាគារខេត្តបន្ទាយមានជ័យ ចំនួនជាង១០០នាក់ បានរួមគ្នា​បរិច្ចាគឈាម ដើ​ម្បី​ជួយ​សង្គ្រោះ​ជី​វិតមនុស្ស ផ្តល់ជូនមន្ទីរពេទ្យបង្អែកមិត្តភាពកម្ពុជា-ជប៉ុន ដែលជាការ​រួម​ចំណែក​ផ្តល់​ឈាម​ជួយ​សង្គ្រោះអាយុជីវិតរបស់ពលរដ្ឋ ដែលកំពុងខ្វះខាតឈាម​នៅ​តាម​បណ្តា​មន្ទីរ​ពេទ្យ​នៅ​ទូទាំង​ខេត្ត​បន្ទាយមានជ័យ។

លោកវេជ្ជបណ្ឌិត ឡេ ច័ន្ទសង្វាត ប្រធានមន្ទីសុខាភិបាលខេត្ត នៃរដ្ឋបាលខេត្តបន្ទាយមានជ័យ តំណាង​រដ្ឋបាលខេត្តក៏បានថ្លែងអំណរគុណថ្នាក់ដឹកនាំ និងមន្ត្រីពន្ធនាគារខេត្តបន្ទាយមានជ័យ ដែល​ចូលរួមបរិច្ចាគឈាមនៅ ដែលជាប្រធានបទដ៏មានអត្ថន័យ និងមានគោល​បំណង​សំខាន់​២​គឺ ៖ ទី១-បង្កើតទម្លាប់ និងវប្បធម៌នៃការបរិច្ចាគឈាមដោយស្ម័គ្រចិត្ត និងជំរុញ​លើក​កម្ពស់​ឱ្យ​យុវជន ប្រជាជនទូទៅចូលរួមធ្វើសកម្មភាពជាមួយសេវាកម្មជាតិផ្តល់ឈាម នៅទូ​ទាំង​ប្រទេស​ដើម្បីធានាឱ្យមានការផ្គត់ផ្គង់ឈាមគ្រប់គ្រាន់ សម្រាប់អ្នក​ជំងឺ​ដែល​កំពុង​ត្រូវ​ការ​ឈាម​នៅ​គ្រប់​មន្ទីរ​ពេទ្យ​ទាំង​អស់ដោយគ្មានការរើសអើង មិនប្រកាន់ជាតិសាសន៍ឬ សាសនា។ ទី២-ផ្សារ​ភ្ជាប់សកម្មភាពនៃការបរិច្ចាគឈាមដោយស្ម័គ្រចិត្ត ទៅនឹងសកម្មភាពមនុស្សធម៌ ដ៏ល្អប្រពៃ​ក្នុង​សង្គម​ ។

ឯកឧត្តម អគ្គានុរក្សថ្នាក់លេខ១ សែម ស៊ីណង អគ្គនាយករង នៃអគ្គនាយកដ្ឋានពន្ធនាគារ បាន​ថ្លែង​ការ​កោតសរសើរថ្នាក់ដឹកនាំ និងមន្ត្រីពន្ធនាគារខេត្តបន្ទាយមានជ័យ ដែលបានរួមគ្នាបរិច្ចាគ ឈាម​ដើម្បីជួយសង្គ្រោះជីវិត និងបានធ្វើសកម្មភាពគ្រប់បែបយ៉ាង ដើម្បី​លើក​កម្ពស់​ការ​បរិច្ចាគ​ឈាម​ដោយ​ស្ម័គ្រចិត្ត និងមិនទទួលកម្រៃ​រួម​ចំណែក​ជួយ​សង្គ្រោះ​ជីវិត​ជន​រង​គ្រោះ​ដោយ​ក្តី​សប្បុរស៕ អត្ថបទ៖ រឿង ចន្ទ្រា