ស្ត្រី កុមារ និងមនុស្សចាស់ ស្ថិតក្នុងចំណោមជនភៀសខ្លួនហ្កាហ្សា ដែលត្រូវបានគេមើលឃើញ កំពុងចាកចេញពីមន្ទីរពេទ្យ Al-Amal ក្នុងទីក្រុង Khan Younis កាលពីថ្ងៃចន្ទ ដែលសង្គមអឌ្ឍចន្ទក្រហមប៉ាឡេស្ទីន (PRCS) បាននិយាយថា ត្រូវបានគេកំណត់គោលដៅដោយការបាញ់ផ្លោងរបស់អ៊ីស្រាអែល។

វីដេអូដែលចេញផ្សាយដោយ សង្គមអឌ្ឍចន្ទក្រហមប៉ាឡេស្ទីន (PRCS) បង្ហាញពីមនុស្សរាប់សិបនាក់កាន់ទ្រព្យសម្បត្តិមួយចំនួន ហើយចាកចេញពីតំបន់នោះ ដោយថ្មើរជើង។ សង្គមអឌ្ឍចន្ទក្រហមប៉ាឡេស្ទីន (PRCS) និយាយថា ពួកគេស្ថិតក្នុងចំណោមគ្រួសារភៀសខ្លួនរាប់រយនាក់ ដែលភៀសខ្លួនចេញពីមន្ទីរពេទ្យ ជាកន្លែងដែលពួកគេបានជ្រកកោនពីការទម្លាក់គ្រាប់បែករបស់អ៊ីស្រាអែល។

រថក្រោះរបស់អ៊ីស្រាអែល បានរុលចូលទៅមុខរយៈពេលពីរសប្តាហ៍មកនេះនៅក្នុងទីក្រុង Khan Younis ជាទីក្រុងធំនៅភាគខាងត្បូង ជាលំនៅឋានរបស់មនុស្សរាប់សែននាក់រួចហើយ ដែលបានភៀសខ្លួនចេញពីតំបន់ផ្សេងៗ។

អាជ្ញាធរតំបន់ហ្កាហ្សា បាននិយាយថា ប្រជាជនប៉ាឡេស្ទីនជាង ២៧.០០០នាក់ ត្រូវបានបញ្ជាក់ថាបានស្លាប់ ក្នុងការវាយប្រហារបស់អ៊ីស្រាអែល ដោយមនុស្សរាប់ពាន់នាក់បន្ថែមទៀតត្រូវបានគេបារម្ភថា មិនអាចរកឃើញនៅក្រោមគំនរបាក់បែក។

អ៊ីស្រាអែល បាននិយាយថា ខ្លួនបានបាត់បង់ទាហាន ២២៦ នាក់ នៅក្នុងតំបន់ហ្កាហ្សា ចាប់តាំងពីមនុស្ស ១.២០០នាក់ ត្រូវបានសម្លាប់ និង ២៥៣នាក់ ត្រូវបានចាប់ចំណាប់ថ្នូរ ក្នុងការវាយប្រហាររបស់ក្រុមហាម៉ាស កាលពីថ្ងៃទី ៧ ខែតុលា ដែលបានបង្កឱ្យមានសង្រ្គាម។