អគ្គលេខាធិការអង្គការសហប្រជាជាតិ លោក Antonio Guterres បានប្រកាសបង្កើតក្រុមពិនិត្យឯករាជ្យ ដើម្បីវាយតម្លៃអព្យាក្រឹតភាពរបស់ទីភ្នាក់ងារអង្គការសហប្រជាជាតិ ដែលផ្តល់ជំនួយសម្រាប់ដែនដីប៉ាឡេស្ទីន នៅតំបន់ហ្កាហ្សា។ ចំណាត់ការនេះ ធ្វើឡើងបន្ទាប់ពីមានការចោទប្រកាន់ថា បុគ្គលិកមួយចំនួនរបស់ទីភ្នាក់ងារផ្តល់ជំនួយនិងការងាររបស់អង្គការសហប្រជាជាតិសម្រាប់ជនភៀសខ្លួនប៉ាឡេស្ទីននៅតំបន់ជិតបូព៌ា ឬ UNRWA បានជាប់ពាក់ព័ន្ធក្នុងការវាយប្រហារដ៏ឃោឃៅរបស់ក្រុមហាម៉ាស លើប្រទេសអ៊ីស្រាអែល កាលពីថ្ងៃទី ៧ ខែតុលា។

លោក Guterres បាននិយាយកាលពីថ្ងៃចន្ទថា អតីតរដ្ឋមន្ត្រីការបរទេសបារាំង លោកស្រី កាទឺរីនកូឡុនណា(Catherine Colonna) នឹងដឹកនាំការពិនិត្យនេះ ដោយមានកិច្ចសហប្រតិបត្តិការពីអង្គការស្រាវជ្រាវចំនួនបីនៅក្នុងប្រទេសស៊ុយអែត ន័រវែស និងប្រទេសដាណឺម៉ាក។

ក្រុមត្រួតពិនិត្យ នឹងចាប់ផ្តើមការងាររបស់ខ្លួននៅថ្ងៃទី ១៤ ខែកុម្ភៈ។ របាយការណ៍ចុងក្រោយ ត្រូវបានគេរំពឹងថានឹងផ្តល់ឲ្យនៅចុងខែមេសា។

ប្រទេសម្ចាស់ជំនួយធំៗ បានបញ្ឈប់ការផ្តល់មូលនិធិសម្រាប់ទីភ្នាក់ងារ UNRWA ក្នុងការឆ្លើយតបទៅនឹងការចោទប្រកាន់នេះ។ ទីភ្នាក់ងារ និយាយថា ទីភ្នាក់ងារអាចនឹងត្រូវបង្ខំឱ្យបញ្ឈប់ប្រតិបត្តិការរបស់ខ្លួននៅចុងខែកុម្ភៈនេះ ប្រសិនបើមូលនិធិនៅតែបន្តផ្អាក។ អ្នកនាំពាក្យអង្គការសហប្រជាជាតិ លោក Stephane Dujarric បាននិយាយទៅកាន់អ្នកសារព័ត៌មានថា ប្រជាជនជិត ២ លាននាក់នៅតំបន់ហ្កាហ្សា ពឹងផ្អែកលើជំនួយរបស់ទីភ្នាក់ងារ UNRWA សម្រាប់ការរស់រានមានជីវិតរបស់ពួកគេ។ លោក បានស្នើឲ្យរដ្ឋសមាជិករបស់អង្គការសហប្រជាជាតិ បង្ហាញពីភាពសប្បុរស និងសាមគ្គីភាព៕