ក្រសួងសង្គមកិច្ច អតីតយុទ្ធជន និងយុវនីតិសម្បទា ក្នុងរយៈពេលប៉ុន្មានឆ្នាំមកនេះ បានសម្រេចនូវសមិទ្ធផលជាច្រើន។ សមិទ្ធផលទាំងនោះ រួមមានការអនុវត្តកម្មវិធីជំនួយសង្គមក្នុងគ្រាដែលជួបវិបត្តិផ្សេងៗ និងការបង្កើតមជ្ឈមណ្ឌលមួយចំនួនដែលបម្រើអត្ថប្រយោជន៍ដល់ក្រុមជនរងគ្រោះ។ នេះជាការលើកឡើងរបស់ ឯកឧត្តម ជា សុមេធី រដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនីតិសម្បទា ក្នុងឱកាសបិទសន្និបាតបូកសរុបការងារប្រចាំឆ្នាំ ២០២៣។

ឯកឧត្តម ជា សុមេធី រដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនីតិសម្បទា បានរាយការណ៍ពីសមិទ្ធផលជាច្រើនដែលក្រសួងសម្រេចបាន ជូនសម្ដេចនាយករដ្ឋមន្ត្រី ហ៊ុន ម៉ាណែត ក្នុងឱកាសបិទសន្និបាតបូកសរុបការងារប្រចាំឆ្នាំ ២០២៣ ។

ឯកឧត្តមរដ្ឋមន្ត្រីលើកឡើងថា ក្រសួងបានអនុវត្តនូវកិច្ចអន្តរាគមន៍ជំនួយសង្គមចំនួន ០៥ នៅក្នុងដំណាក់កាលនៃការ កើតមាននូវវិបត្តិផ្សេងៗ។ កម្មវិធីជំនួយសង្គមដំបូង គឺកម្មវីធីឧបត្ថម្ភសាច់ប្រាក់ជូនស្ត្រីមានផ្ទៃពោះ និងកុមារអាយុក្រោម២ឆ្នាំ ដោយបានផ្តល់សេវាជូនអ្នក ទទួលផលសរុបចំនួនជាង ៣៦ ម៉ឺននាក់ ចំណាយថវិកាអស់ ៣២ លានដុល្លារ។ កម្មវិធីនេះ ជាកម្មវិធីអចិន្ត្រៃយ៍។

កម្មវីធីបន្ទាប់ គឺការឧបត្ថម្ភសាច់ប្រាក់ជូនដល់គ្រួសារក្រីក្រ និងងាយរងគ្រោះ ក្នុងអំឡុងពេលប្រយុទ្ធនឹងជំងឺ កូវីដ-១៩ ជាកម្មវិធីធំជាប្រវត្តិសាស្ត្រ សម្រាប់កម្ពុជា ដោយជួយដល់គ្រួសារមានបណ្ណក្រីក្រទូទាំងប្រទេស។ កម្មវិធីនេះ បានអនុវត្តតាំងពី ខែមិថុនា ឆ្នាំ ២០២០ ដោយរដ្ឋបានជួយដល់គ្រួសារក្រីក្រ ក្នុងវង្វង់ ៧១ ម៉ឺនគ្រួសារ និងចំណាយថវិកាអស់ប្រមាណ ជាង ១៣០៦ លាន ដុល្លារ គិតត្រឹមថ្ងៃទី ខែមករា ឆ្នាំ២០២៤។

កម្មវិធីជំនួយសង្គមទី ៣ គឺកម្មវិធីជំនួយសង្គមជាសាច់ប្រាក់ក្រោយពេលបិទខ្ចប់។ កម្មវិធីនេះ សម្រាប់ប្រជាពលរដ្ឋមានការលំបាកផ្នែកជីវភាព, ប្រជាពលរដ្ឋ និងគ្រួសារដែលមានអ្នកឆ្លងជំងឺកូវីដ-១៩ និងមានការលំបាកផ្នែកជីវភាព, និង គ្រួសារ ប្រជាពលរដ្ឋដែលមានអ្នកស្លាប់ដោយសារជំងឺកូវីដ-១៩ ក្នុងព្រឹត្តិការណ៏ ២០ កុម្ភៈ ២០២១។ កម្មវិធីនេះ រដ្ឋចំណាយថវិកាចំនួន ៦,៦៨ លាន ដុល្លារ។

 កម្មវិធីជំនួយសង្គមទី ៤ គឺជាការជួយដល់ គ្រួសាររងហានិភ័យ ដែលរងផលប៉ះពាល់ធ្ងន់ធ្ងរពីគ្រោះទឹកជំនន់ ដែលបានអនុវត្តនៅ ថ្ងៃទី១០ ខែធ្នូ ឆ្នាំ២០២២ ហើយបិទបញ្ចប់នៅថ្ងៃទី១០ ខែមីនា ឆ្នាំ២០២៣។ កម្មវិធីនេះ មានអ្នកទទួលផលសរុបចំនួន ៩៩ ១៦៩ គ្រួសារ ដោយចំណាយថវិកាសរុប ១១,៧០ លានដុល្លារ។

ចំពោះកម្មវិធីជំនួយសង្គមទី ៥ គឺការឧបត្ថម្ភសាច់ប្រាក់ជូនគ្រួសារងាយរងហានិភ័យក្នុងអំឡុង ពេលមានសម្ពាធអតិផរណា។ កម្មវិធីនេះ បានចាប់ផ្ដើមអនុវត្តនៅ ខែធ្នូ ឆ្នាំ២០២២ និងបញ្ចប់នៅខែកក្កដា ឆ្នាំ២០២៣ មានអ្នកទទួលផលសរុប ចំនួន ៤៩៥ ៣០៧ គ្រួសារ ដោយចំណាយថវិកាអស់ចំនួន ៤៤ លានដុល្លារ។

ក្រៅពីកម្មវិធីជំនួយសង្គម ដែលបានដាក់ឱ្យអនុវត្តទាំងនេះ ក្រសួងសង្គមកិច្ចក៏បានរៀបចំ និងដាក់សម្ពោធឱ្យប្រើប្រាស់ជាផ្លូវការនូវមជ្ឈមណ្ឌលមួយចំនួនផងដែរ។ មជ្ឈមណ្ឌលទាំងនោះរួមមាន មជ្ឈមណ្ឌលសំចតប៉ោយប៉ែត ខេត្តបន្ទាយមានជ័យ មជ្ឈមណ្ឌលថែទាំ និងស្តារនីតិសម្បទាជនវិបល្លាសស្មារតី  មជ្ឈមណ្ឌលជាតិព្យាបាល និងស្តារនីតិសម្បទាអ្នកញៀន គ្រឿងញៀនដោយស្ម័គ្រចិត្ត និង ផ្អែកលើសហគមន៍ កែវ ផុស” ខេត្តព្រះសីហនុមជ្ឈមណ្ឌលជាតិព្យាបាល និងស្តារនីតិសម្បទាអ្នកញៀនគ្រឿងញៀន កណ្តាលស្ទឹង ខេត្ត កណ្តាល មណ្ឌលថែទាំមនុស្សចាស់ ហើយក្រសួងក៏កំពុងកសាងមជ្ឈមណ្ឌលជាតិជនពិការកម្ពុជា ដែលស្ថិតនៅស្រុកអង្គស្នួល ខេត្ត កណ្តាលផងដែរ៕ អត្ថបទ៖ គឹមហុក