យុវជន យុវនារីជាច្រើនបាននាំគ្នាបន្តការរៀនជំនាញឆុងកាហ្វេរយៈពេលខ្លីជារៀងរាល់ថ្ងៃ ដើម្បីអាចស្វែងរកការងារធ្វើ និងអាចបើកអាជីវកម្មខ្នាតតូចដោយខ្លួនឯងបាន ខណៈជំនាញរបស់ពួកគេបានពង្រឹងគុណភាព និងសេវាឆុងកាហ្វេតាមរូបមន្ត និងក្បួនខ្នាតត្រឹមត្រូវរបស់ក្រសួងទេសចរណ៍។

សិក្ខាកាមដែលបានរៀនចប់វគ្គបណ្តុះបណ្តាលជំនាញឆុងកាហ្វេនៅវិទ្យាស្ថានខូហ្វី បានប្រាប់នៅថ្ងៃទី៦ ខែកុម្ភៈនេះថា បច្ចុប្បន្នបើទោះនៅក្នុងរាជធានីភ្នំពេញ មុខរបរឆុងកាហ្វេលក់កំពុងមានរីកដុះដាលច្រើនប៉ុន្ដែការរៀនជំនាញឆុងកាហ្វេ និងភេសជ្ជៈឱ្យមានចំណេះដឹងច្បាស់លាស់ គឺមានសារៈសំខាន់ណាស់សម្រាប់ស្វែងរកការងារធ្វើ ឬទៅប្រកបការងារ និងបើកអាជីវកម្មខ្នាតតូចដោយខ្លួនឯងនាថ្ងៃអនាគត។

លោក វ៉ន វឌ្ឍទិត្យា គ្រូបង្កោលនៅវិទ្យាស្ថានខូហ្វី ថ្លែងថា ដោយមានកិច្ចសហការល្អជាមួយក្រសួងទេសចរណ៍ សើ្ទរៀងរាល់ឆ្នាំវិទ្យាស្ថានបានទទួលសិក្ខាកាមដែលភាគច្រើនជាយុវជនបានមករៀនជំនាញឆុងកាហ្វេ និងភេសជ្ជៈ រយៈពេលខ្លី ក្រោមរូបភាពមិនបង់ថ្លៃ។ ខណៈវគ្គបណ្ដុះបណ្ដាលកន្លងមកមានយុវជនប្រមាណជាង ៣០០០ នាក់ហើយដែលបានមកសិក្សាជំនាញនេះពីវិទ្យាស្ថាន។

លោក មាន វណ្ណដេត ប្រធាននាយកដ្ឋានបណ្ដុះបណ្ដាជំនាញវិជ្ជាជីវៈទេសចរណ៍ នៃក្រសួងទេសចរណ៍ ថ្លែងថា នៅក្នុងឆ្នាំ២០២៣នេះ ក្រសួងទេសចរណ៍បានទទួលសិក្ខាកាមចុះឈ្មោះរៀនជំនាញឆុងកាហ្វេនិងភេសជ្ជៈតាមប្រព័ន្ធអនឡាញ និងអនុវត្តផ្ទាល់ បានប្រមាណជាង ៣៨០០ នាក់ហើយអ្នកដែលបានចុះរៀនជំនាញឆុងកាហ្វេនោះ ភាគច្រើនមានដូចជា អ្នកបម្រើការងារក្នុងវិស័យកាហ្វេ ម្ចាស់អាជីវកម្មកាហ្វេ និងយុវជន សិស្សនិស្សិតនានាទៀតដែលរៀនមានបំណងបើកអាជីវកម្មផ្ទាល់ខ្លួនរបស់គេ៕ អត្ថបទ៖ ស៊ុម សុខជា