អង្គការសហប្រជាជាតិ បាននិយាយថា ខ្លួននឹងស៊ើបអង្កេតទីភ្នាក់ងាររបស់ខ្លួនសម្រាប់ជនភៀសខ្លួនប៉ាឡេស្ទីន ដើម្បីធានាបាននូវ «អព្យាក្រឹតភាព» បន្ទាប់ពីការចោទប្រកាន់របស់អ៊ីស្រាអែលថា យ៉ាងហោចណាស់បុគ្គលិកUN ចំនួន ១២នាក់ បានជួយដល់ការវាយប្រហារភេរវកម្មថ្ងៃទី៧ ខែតុលាដ៏សាហាវរបស់ក្រុមហាម៉ាស។

អគ្គលេខាធិការUN លោកអង់តូនីញ៉ូ ហ្គុយតឺរេស (Antonio Guterres) បានប្រកាសពីចំណាត់ការនេះនៅក្នុងសេចក្តីថ្លែងការណ៍មួយកាលពីថ្ងៃចន្ទ ដោយនិយាយថា លោកបានបង្កើត «ក្រុមត្រួតពិនិត្យឯករាជ្យ» ដើម្បីស៊ើបអង្កេត «ការចោទប្រកាន់អំពីការរំលោភបំពានដ៏ធ្ងន់ធ្ងរ» នៅទីភ្នាក់ងារជំនួយ និងការងាររបស់អង្គការសហប្រជាជាតិសម្រាប់ជនភៀសខ្លួនប៉ាឡេស្ទីន នៅតំបន់ជិតបូព៌ា (UNRWA)។

ប្រមុខUN បាននិយាយថា ការស៊ើបអង្កេត នឹងប្រឹងប្រែងដើម្បី «កំណត់យន្តការ និងនីតិវិធីដែល នាពេលបច្ចុប្បន្ន ទីភ្នាក់ងារមាននេះ កំពុងស្ថិតនៅ ដើម្បីធានានូវអព្យាក្រឹតភាព និងដើម្បីឆ្លើយតបទៅនឹងការចោទប្រកាន់ ឬព័ត៌មានដែលបង្ហាញថា គោលការណ៍នេះ អាចត្រូវបានគេរំលោភបំពាន»។

ទោះបីជាលោកហ្គុយតឺរេស ឈប់និយាយខ្លីអំពីការរំលោភបំពានក៏ដោយ ក៏មន្ត្រីអ៊ីស្រាអែល បានចោទប្រកាន់ម្តងហើយម្តងទៀតថា បុគ្គលិក UNRWA ចំនួន ១២នាក់ បានជាប់ពាក់ព័ន្ធក្នុងការវាយប្រហាររបស់ក្រុមហាម៉ាសកាលពីឆ្នាំមុន ដែលបានសម្លាប់មនុស្សប្រហែល ១.២០០ នាក់នៅក្នុងប្រទេសអ៊ីស្រាអែល និងបានឃើញជាង ២០០នាក់ ត្រូវបានចាប់ធ្វើជាចំណាប់ថ្នូរ ដោយក្រុមសកម្មប្រយុទ្ធប៉ាឡេស្ទីន។

ក្រោយមក រដ្ឋមន្ត្រីការបរទេសអ៊ីស្រាអែល លោក អ៊ីស្រាអែ កាតហ្ស៍ ( Israel Katz) បានសាទរចំពោះការសម្រេចចិត្តនេះ ដោយនិយាយថា៖«យើងនឹងបញ្ជូនភ័ស្តុតាងទាំងអស់ដែលបញ្ជាក់ពីទំនាក់ទំនងរបស់ UNRWA ចំពោះអំពើភេរវកម្ម និងផលប៉ះពាល់ដ៏គ្រោះថ្នាក់របស់វាទៅលើស្ថិរភាពក្នុងតំបន់»។

លោកហ្គុយតឺរេស ធ្លាប់បានទទួលស្គាល់ថា បុគ្គលិក៩នាក់ក្នុងចំណោម ១២នាក់របស់អង្គការសហប្រជាជាតិដែលត្រូវបានចោទប្រកាន់ថា មានទំនាក់ទំនងជាមួយក្រុមហាម៉ាស ត្រូវបានបណ្តេញចេញ ពីរនាក់នៅតែមិនស្គាល់អត្តសញ្ញាណ និងម្នាក់ទៀត ត្រូវបានសម្លាប់ ចាប់តាំងពីពេលនោះមក។ ទោះបីជាការចោទប្រកាន់របស់អ៊ីស្រាអែល មិនទាន់ត្រូវបានបញ្ជាក់ដោយឯករាជ្យក៏ដោយ ក៏ប្រទេសជាង១០ បានជ្រើសរើសរួចហើយក្នុងការកាត់ផ្តាច់ការផ្តល់មូលនិធិដល់ទីភ្នាក់ងារជនភៀសខ្លួន ចំពេលមានភាពចម្រូងចម្រាស រួមមានសហរដ្ឋអាមេរិក ស៊ុយអែត អង់គ្លេស និងអាល្លឺម៉ង់។