មនុស្សជាងមួយម៉ឺននាក់ បានធ្វើការរំលឹកខួប ថ្ងៃ ទី៦ ខែកុម្ភៈ នៅកណ្តាលទីក្រុង Hatay សម្រាប់ខួប១ឆ្នាំ នៃការរញ្ជួយដីដ៏មហន្តរាយនៅក្នុងប្រទេសទួរគី ខណៈមនុស្សមួយចំនួនបានតវ៉ាប្រឆាំងរដ្ឋាភិបាលចំពោះអ្វីដែលពួកគេនិយាយថា ជាការមិនយកចិត្តទុកដាក់ចំពោះទីក្រុងនេះបន្ទាប់ពីមហន្តរាយ។ ប្រជាជន បានអំពាវនាវឲ្យមានការលាលែងពីតំណែងរបស់រដ្ឋាភិបាល អធិការនគរបាលតំបន់ និងអភិបាលក្រុង Hatay ។ ក្រុមអ្នកតវ៉ា និយាយថា ពួកគេមិនចង់ឲ្យការរំលឹកខួបនេះ ក្លាយជាកន្លែងសម្រាប់មន្ត្រីដើម្បីបង្ហាញវត្តមាននោះទេ ប៉ុន្តែ គួរតែជាពេលវេលាដ៏ស្ងប់ស្ងាត់នៃការចងចាំ។

ពលរដ្ឋនិយាយថា មនុស្សជាច្រើននាក់ បានស្លាប់ពុំមែនដោយសារអគារបាក់រលំនោះទេ ប៉ុន្តែដោយសារការរង់ចាំយូរពេកក្នុងអាកាសធាតុត្រជាក់ខ្លាំង។ បន្ទាប់ពីការរំលឹកខួប មនុស្សជាច្រើនបានបោះផ្កាទៅក្នុងទឹកទន្លេ Asi ដែលហូរកាត់ទីក្រុង។ នាង មឺវហ្គូស៊ែល(Merve Gursel) ដែលបានបាត់បង់មីង ស្វាមីរបស់មីងរបស់នាង និងបងប្អូនជីដូនមួយ នៅក្នុងការរញ្ជួយដី បានស្រែកហៅឈ្មោះរបស់ពួកគេនៅពេលនាងបោះផ្កា ចូលទៅក្នុងទឹកសម្រាប់មនុស្សជាទីស្រលាញ់ម្នាក់ៗ។ នាងនិយាយថា កំហឹងដែលប្រជាពលរដ្ឋមាន ប្រឆាំងរដ្ឋាភិបាល គឺជារឿងត្រឹមត្រូវ ព្រោះប្រជាជនមិនអាចស្តាប់ឮសំឡេងមនុស្សជាទីស្រលាញ់របស់ពួកគេ។ នាង ណេស៊ីប ឌូសហ្គាន់(Nesibe Duzgun) និយាយថានាង បោះផ្កាទៅក្នុងទឹកសម្រាប់អ្នកគ្រប់គ្នាដែលនាងស្គាល់ ហើយនិយាយថា សកម្មភាពនេះបានបង្រួបបង្រួមប្រជាជនទីក្រុង Hatay ដែលបានបាត់បង់មិត្តភក្តិ និងក្រុមគ្រួសារជាច្រើននាក់ ដោយគ្រោះរញ្ជួយដី។

ការរញ្ជួយដីកម្រិត ៧,៨ រិចទ័រ បានវាយលុកទីក្រុងនានា និងទីក្រុងនៅភាគអាគ្នេយ៍របស់ប្រទេស និងប្រទេសជិតខាងស៊ីរី ដែលមហន្តរាយនេះបណ្តាលឲ្យមនុស្សជាង ៥០.០០០នាក់ស្លាប់នៅក្នុងប្រទេសទួរគី និងប្រហែល ៥.៩០០នាក់ស្លាប់នៅក្នុងប្រទេសស៊ីរី និងបានបណ្តាលឱ្យមនុស្សរាប់លាននាក់គ្មានផ្ទះសម្បែងរស់នៅ។