អាជ្ញាធរ បាននិយាយថា នាវាមួយគ្រឿងដែលធ្វើដំណើរឆ្លងកាត់សមុទ្រក្រហមភាគខាងត្បូង ត្រូវបានវាយប្រហារដោយយានដ្រូនរបស់ក្រុមឧទ្ទាមហ៊ួទីនៅប្រទេសយេម៉ែន កាលពីព្រឹកថ្ងៃអង្គារ ដែលជាការវាយប្រហារចុងក្រោយបំផុតនៅក្នុងយុទ្ធនាការរបស់ពួកគេសំដៅលើនាវាជុំវិញសង្គ្រាមរបស់អ៊ីស្រាអែលលើក្រុមហាម៉ាស នៅតំបន់ហ្កាហ្សាស្ទ្រីប។

អាជ្ញាធរ បានបន្តថា កិច្ចប្រតិបត្តិការពាណិជ្ជកម្មដែនសមុទ្ររបស់ចក្រភពអង់គ្លេស បាននិយាយថា ការវាយប្រហារ បានកើតឡើងនៅភាគខាងលិចនៃទីក្រុងហូដេដា ( Hodeida) ប្រទេសយេម៉ែន ហើយគ្រាប់ផ្លោង បានបណ្តាលបង្ក «ការខូចខាតតិចតួច »ដល់បង្អួចរបស់នាវានៅលើស្ពាន។ នាវាតូចមួយគ្រឿង បាននៅក្បែរនាវានោះ នៅមុនពេលការវាយប្រហារកើតឡើង។

ក្រុមហ៊ុនសន្តិសុខឯកជន Ambrey បានកំណត់អត្តសញ្ញាណនាវានេះថា ជានាវាដឹកទំនិញរបស់អង់គ្លេសដែលមានទង់ជាតិរបស់ប្រទេសបាបាដូស (Barbados)។ ក្រុមហ៊ុននេះ បាននិយាយថា មិនមាននរណាម្នាក់ រងរបួសនៅលើនាវាដែលបានរងការខូចខាតតិចតួចនោះ។

ពុំមានក្រុមណាមួយ បានចេញមុខអះអាងទទួលខុសត្រូវចំពោះការវាយប្រហារនេះភ្លាមៗនោះទេ។ ទោះបីជាយ៉ាងណាក៏ដោយ ការសង្ស័យភ្លាមៗ បានធ្លាក់ទៅលើក្រុមឧទ្ទាមហ៊ួទី ដែលគាំទ្រដោយអ៊ីរ៉ង់នៅយេម៉ែន។

ចាប់តាំងពីខែវិច្ឆិកាមក ក្រុមឧទ្ទាមនេះ បានកំណត់គោលដៅម្តងហើយម្តងទៀតលើនាវា នៅសមុទ្រក្រហម ជុំវិញការវាយលុករបស់អ៊ីស្រាអែល នៅតំបន់ហ្កាហ្សាប្រឆាំងនឹងក្រុមហាម៉ាស។ ប៉ុន្តែពួកគេ បានកំណត់គោលដៅជាញឹកញាប់លើនាវាដែលមានទំនាក់ទំនងតឹងតែង ឬមិនមានទំនាក់ទំនងច្បាស់លាស់ទៅកាន់ប្រទេសអ៊ីស្រាអែល ដោយធ្វើឲ្យមានការរំខានដល់ការដឹកជញ្ជូននៅក្នុងផ្លូវសំខាន់សម្រាប់ពាណិជ្ជកម្មក្នុងចំណោមអាស៊ី មជ្ឈិមបូព៌ា និងអឺរ៉ុប។