មន្ទីរបច្ចកោណ និយាយកាលពីថ្ងៃចន្ទថា ខ្លួនពុំបានដឹងនោះទេ ថាមានការស្លាប់របស់ជនជាតិអ៊ីរ៉ង់ណាម្នាក់ នៅក្នុងការវាយប្រហារកាលពីពេលថ្មីៗនេះរបស់សហរដ្ឋអាមេរិកលើគោលដៅមានទំនាក់ទំនងជាមួយអ៊ីរ៉ង់នៅប្រទេសអ៊ីរ៉ាក់ និងប្រទេសស៊ីរី ។

គួរឲ្យដឹងថា សហរដ្ឋអាមេរិក បានបើកការវាយប្រហារតាមច្រកអាកាសនៅប្រទេសអ៊ីរ៉ាក់ និងប្រទេសស៊ីរី កាលពីថ្ងៃសុក្រសប្តាហ៍មុន ទៅលើគោលដៅជាង ៨៥កន្លែងដែលមានទំនាក់ទំនងជាមួយឆ្មាំបដិវត្តន៍អ៊ីរ៉ង់(IRGC) និងក្រុមជីវពលដែលពួកគេគាំទ្រ ជាការសងសឹកសម្រាប់ការវាយប្រហារសម្លាប់ទាហានសហរដ្ឋអាមេរិក ។ 

លោកឧត្តមសេនីយ៍ទោ Patrick Ryder នៃកងទ័ពអាកាសសហរដ្ឋអាមេរិក បាននិយាយប្រាប់ក្រុមអ្នកសារព័ត៌មានថា ការចង្អុរបង្ហាញដំបូង គឺថាការវាយប្រហារនេះ ពុំបានសម្លាប់ជនជាតិអ៊ីរ៉ង់ណាម្នាក់នោះទេ ប៉ុន្តែលោកនិយាយថា គ្រោះថ្នាក់ផ្សេងទៀត ទំនងជាកើតមានឡើង ដោយលោកមិនបានផ្តល់សេចក្តីលម្អិតនោះឡើយ ។

កងកម្លាំងចល័តប្រជាមានិតអ៊ីរ៉ាក់ ដែលជាកងកម្លាំងសន្តិសុខរដ្ឋរួមទាំងក្រុមគាំទ្រដោយអ៊ីរ៉ង់ និយាយថា សមាជិករបស់ខ្លួនចំនួន ១៦នាក់ ត្រូវបានសម្លាប់ រួមទាំងយុទ្ធជន និងពេទ្យបឋមផងដែរ ។ 

ដំបូងឡើយ រដ្ឋាភិបាលអ៊ីរ៉ាក់ និយាយថា ជនស៊ីវិលស្ថិតនៅក្នុងចំណោមមនុស្សស្លាប់ ១៦នាក់ ។

ដោយឡែក នៅក្នុងប្រទេសស៊ីរីវិញ ការវាយប្រហារទាំងនេះ បានសម្លាប់មនុស្ស ២៣នាក់ ដែលការពារទីតំាងគោលដៅ ៕