រដ្ឋមន្ត្រីការបរទេសរបស់ប្រទេសកាតេម៉ាឡា បានប្រាប់សារព័ត៌មាន Reuters កាលពីថ្ងៃចន្ទ (ទី៥ កុម្ភៈ) ថា ប្រទេសអាមេរិកកណ្តាលមួយនេះកំពុងពិចារណាឈានដល់ការលើកកម្ពស់ទំនាក់ទំនងពាណិជ្ជកម្មផ្លូវការជាមួយប្រទេសចិន បើទោះបីជាខ្លួនមានគម្រោងរក្សាទំនាក់ទំនងដែលមានស្រាប់ជាមួយកោះតៃវ៉ាន់ក៏ដោយ។

ប្រទេសនៅតំបន់អាមេរិកកណ្តាលនេះ ជាសម្ព័ន្ធមិត្តនៅសល់មួយចំនួនតូចរបស់កោះតៃវ៉ាន់ ខណៈដែលប្រទេសកាន់តែច្រើនឡើងៗ ឈរជាមួយនឹងមហាអំណាចប្រទេសសេដ្ឋកិច្ចធំបំផុតទី២ របស់ពិភពលោក គឺចិនដែលអះអាងថា កោះតៃវ៉ាន់គ្រប់គ្រងតាមបែបប្រជាធិបតេយ្យនើ ជាចំណែកនៃដែនដីរបស់ខ្លួន។

រដ្ឋមន្ត្រីការបរទេសលោក Carlos Ramiro Martinez បាននិយាយនៅក្នុងបទសម្ភាសន៍មួយថា៖ «យើងនឹងបន្តធ្វើការជាមួយកោះតៃវ៉ាន់ ក្នុងកម្រិតដែលយើងកំពុងធ្វើ។ ប៉ុន្តែលោកប្រធានាធិបតីបានចង្អុលបង្ហាញថា យើងមិនអាចព្រងើយកន្តើយ ចំពោះឥទ្ធិពល និងអំណាចដែលប្រទេសចិនបង្ហាញនោះទេ»។

គួរបញ្ចាក់ដែរថា ប្រធានាធិបតីលោក Bernardo Arevalo បានចូលកាន់តំណែង នៅពាក់កណ្តាលខែមករា ចំពេលមានដំណើរការផ្លាស់ប្តូរយ៉ាងតឹងតែង ដោយលោកបានប្តេជ្ញាថា នឹងបញ្ចប់អំពើពុករលួយ និងបង្កើតទំនាក់ទំនងជាមួយប្រទេសចិនផងដែរ។

ប្រទេសចិនបានបង្កើនឥទ្ធិពលសេដ្ឋកិច្ចរបស់ខ្លួន នៅអាមេរិកឡាទីន ក្នុងប៉ុន្មានឆ្នាំថ្មីៗនេះ ជាកន្លែងដែលប្រទេសនានាមានទំនាក់ទំនងជិតស្និទ្ធជាប្រវត្តិសាស្ត្រជាមួយសហរដ្ឋអាមេរិក។ ប្រទេសអាមេរិកកណ្តាលជាច្រើន ក្នុងរយៈពេលប៉ុន្មានឆ្នាំចុងក្រោយនេះ បានប្តូរភាពស្មោះត្រង់ពីកោះតៃវ៉ាន់ទៅកាន់ចិនវិញ៕