ក្រិក៖ លោកនាយករដ្ឋមន្ត្រី Kyriakos Mitsotakis និយាយថា ប្រទេសក្រិកនឹងផ្តល់ឲ្យប្រជាជនវ័យក្មេងដែលមានអាយុចន្លោះពី ១៨ ទៅ ២៥ឆ្នាំនូវកាតបង់ប្រាក់ជាមុនដែលមានតម្លៃ ១៥០អឺរ៉ូ (១៧៩ដុល្លារសហរដ្ឋអាមេរិក) ដើម្បីទទួលដូសវ៉ាក់សាំងការពារវីរុស Covid-19 លើកទី១ របស់ពួកគេ។
លោក Mitsotakis បាននិយាយថា អ្វីដែលហៅថា “ប័ណ្ណឆ្លងកាត់ដោយសេរី” នឹងអាចទទួលបាននៅចុងខែកក្កដា ដើម្បីប្រើសម្រាប់ការធ្វើដំណើរ និងព្រឹត្តិការណ៍វប្បធម៌ក្នុងការជំរុញរបស់រដ្ឋាភិបាល ដើម្បីបង្កើនអត្រាការចាក់វ៉ាក់សាំងក្នុងពេលសម្រាកវិស្សមកាល។ លោកបានលើកឡើងថា វិធានការនេះពាក់ព័ន្ធនឹងយុវជនចំនួន ៩៤០.០០០នាក់ ហើយអ្នកកាន់ប័ណ្ណអាចប្រើដើម្បីបង់ថ្លៃសំបុត្រយន្តហោះ នាវា ឬរថភ្លើង កន្លែងស្នាក់នៅក្នុងសណ្ឋាគារ និងកន្លែងបោះតង់ ក៏ដូចជាថ្លៃចូលទស្សនាការប្រគំតន្ត្រី រោងភាពយន្ត សារមន្ទីរ និងទីតាំង បុរាណវិទ្យា។ លោក Mitsotakis បានពន្យល់ថា ប័ណ្ណនេះគឺជាផ្នែកមួយនៃយុទ្ធនាការថ្មី ដែលបានចាប់ផ្ដើមដោយរដ្ឋប្រទេសក្រិក ដើម្បីជំរុញទឹកចិត្តដល់ពលរដ្ឋដែលមិនទាន់បានចាក់វ៉ាក់សាំង ឱ្យធ្វើការណាត់ជួបនៅពេលឆាប់ៗនេះ ដើម្បីឱ្យប្រទេសក្រិកអាចកសាងជញ្ជាំងភាពស៊ាំទៅនឹងមេរោគ។
រដ្ឋាភិបាលបាននិយាយថា រហូតមកដល់ពេលនេះវ៉ាក់សាំងការពារវីរុសចំនួនជាង ៨លានដូសត្រូវបានផ្តល់នៅក្នុងប្រទេសក្រិក។ មនុស្សជាង ៣.៦លាននាក់ (ប្រហែល ៣៥% នៃប្រជាជនទូទៅ និង៤២% នៃមនុស្សពេញវ័យនៅប្រទេសក្រិក) បានទទួលការចាក់វ៉ាក់សាំងពេញលេញ ហើយប្រជាជនចំនួន ៤,៧លាននាក់បានទទួលការចាក់វ៉ាក់សាំងបង្ការលើកទី១។ រដ្ឋាភិបាលបានប៉ាន់ប្រមាណថា នៅចុងខែកក្កដា ៤៨% នៃប្រជាជនទូទៅ (៥៧% នៃមនុស្សពេញវ័យ) នឹងបានចាក់វ៉ាក់សាំងពេញលេញប្រឆាំងវីរុសឆ្លង។ លោកនាយករដ្ឋមន្ត្រីបាននិយាយថា ចាប់តាំងពីមេរោគរាតត្បាតចាប់ផ្តើម រដ្ឋាភិបាលក្រិកបានគាំទ្រដល់ប្រព័ន្ធសុខាភិបាលជាតិ និយោជិក និងក្រុមហ៊ុនដែលមានទឹកប្រាក់ប្រមាណ ៤០ពាន់លានអឺរ៉ូ ហើយបច្ចុប្បន្ននេះវាដល់ពេលដែលរដ្ឋផ្តល់រង្វាន់ដល់ក្រុមយុវជន៕
អត្ថបទ៖ ប៊ុនថន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
