ប្រទេសប៉ាគីស្ថាន នឹងរៀបចំការបោះឆ្នោតសកលរបស់ពួកគេនៅថ្ងៃព្រហស្បតិ៍នេះ ដែលជាការបោះឆ្នោតលើកដំបូង ចាប់តាំងពីឆ្នាំ ២០១៨ ស្របពេលដែលប្រទេសមួយនេះ កំពុងជួបវិបត្តិសេដ្ឋកិច្ច អតិផរណាហក់ឡើងខ្ពស់ ការធ្លាក់ថ្លៃរូបិយវត្ថុ និងការត្រួសត្រាយផ្លូវងើបឡើងវិញ ក្រោមកម្មវិធីប្រាក់សង្រ្គោះ ៣ពាន់លានដុល្លាររបស់មូលនិធិរូបិយវត្ថុអន្តរជាតិ(IMF) ។ 

ប្រទេសនៅអាស៊ីខាងត្បូងមួយនេះ ប្រតិបត្តិការក្រោមរដ្ឋាភិបាលចាំផ្ទះ និងកម្មវិធីប្រាក់កម្ចីរបស់ IMF ដែលបានអនុម័តកាលពីខែកក្កដា ។

ក្រោមកិច្ចព្រមព្រៀងប្រាក់សង្រ្គោះ IMF តម្រូវឲ្យប៉ាគីស្ថានប្រមូលពន្ធថ្មីចំនួន ១,៣៤ពាន់លានដុល្លារ ដើម្បីឈានដល់ការទូទាត់សារពើពន្ធ ។ វិធានការនេះដែរ បង្កឲ្យកើតមានអតិផរណាហក់ឡើងខ្ពស់រហូតដល់ ៣៨ភាគរយ កាលពីខែឧសភា ដែលវានៅតែស្ថិតនៅពីលើអត្រា ៣០ភាគរយ ។

លោក Ishfaq Hussain គឺជាអ្នករត់រ៉ឺម៉កកង់បី អស់រយៈពេល ២០ឆ្នាំមកហើយ ប៉ុន្តែលោកនិយាយថា ជីវិតរបស់លោកពុំធ្លាប់ដែលពិបាកដូចសព្វថ្ងៃនោះទេ ។

ឪពុកកូន ៦ម្នាក់ វ័យ ៤៨ឆ្នាំម្នាក់នេះ អាចរកបានប្រាក់ពី ១ពាន់រូពី(ស្មើនឹង ៤ដុល្លារ) ដល់ ១.២០០រូពី(ស្មើនឹង៤,៣ដុល្លារ)ក្នុង១ថ្ងៃ កាលពីរយៈពេល ៥ឆ្នាំមុន ប៉ុន្តែអតិផរណានៅប៉ាគីស្ថាន ហើយនិងតម្លៃប្រេងឥន្ធនៈហក់ឡើងខ្ពស់បំផុត បានស៊ីប្រាក់ចំណូលរបស់គាត់ ។

លោកថា បច្ចុប្បន្នក្រោយបង់ថ្លៃជួលរ៉ឺម៉កកង់បីរបស់លោក និងថ្លៃសាំង ដែលមានតម្លៃកើនឡើងទ្វេដងពីរយៈពេល ៥ឆ្នាំមុន លោកអាចរកប្រាក់ចូលផ្ទះបានត្រឹម ៥០០រូពី(ស្មើនឹង ១,៨ដុល្លារ)ប៉ុណ្ណោះ ក្រោយធ្វើការពេញមួយថ្ងៃ ដែលវាមិនគ្រប់គ្រាន់នោះទេ ក្នុងការចិញ្ចឹមសមាជិកគ្រួសារ ៨នាក់របស់គាត់ ៕