អ្នកនាំពាក្យវិមានក្រឹមឡាំង លោក Dmitry Peskov បានព្រមានកាលពីថ្ងៃចន្ទថា អ្នកណាដែលរឹបអូសទ្រព្យសម្បត្តិរុស្ស៊ី នឹងប្រឈមនឹងផលវិបាកយូរអង្វែង។ ការអត្ថាធិប្បាយរបស់លោក បានកើតឡើងបន្ទាប់ពីសារព័ត៌មាន Financial Times បានរាយការណ៍ថា ក្រុមប្រទេស G7 កំពុងពិចារណាប្រើប្រាស់មូលនិធិរុស្ស៊ីដែលបង្កកជាវត្ថុបញ្ចាំ ដើម្បីផ្តល់ហិរញ្ញប្បទានដល់អ៊ុយក្រែន។

នៅក្នុងអត្ថបទមួយដែលបានចេញផ្សាយកាលពីថ្ងៃសៅរ៍ សារព័ត៌មាននេះ បានអះអាងថា រដ្ឋាភិបាលបែលហ្ស៊ិក បានស្នើផែនការមួយដែលរដ្ឋាភិបាលលោកខាងលិច នឹងបង្កើនបំណុល ដើម្បីផ្តល់ហិរញ្ញប្បទានដល់រដ្ឋាភិបាលអ៊ុយក្រែន ហើយបន្ទាប់មកទាមទារឲ្យរុស្ស៊ីសងបំណុលនោះ។ ប្រសិនបើទីក្រុងមូស្គូបរាជ័យ ក្នុងការធ្វើដូច្នេះ ក្រុមប្រទេស G7 នឹងរឹបអូសទ្រព្យសម្បត្តិរបស់រុស្ស៊ីដែលជាប់គាំងដែលកំពុងត្រូវគ្រប់គ្រងនៅអឺរ៉ុប និងសហរដ្ឋអាមេរិក។

បុគ្គលម្នាក់ដែលដឹងអំពីការចរចានេះ បានប្រាប់អ្នកសារព័ត៌មានថា ផែនការនេះ ត្រូវបានគេមើលឃើញថា ជាមធ្យោបាយមួយ ដើម្បីគេចចេញពីបញ្ហាផ្លូវច្បាប់នៃការរឹបអូសទ្រព្យសម្បត្តិរបស់រុស្ស៊ី។ គំនិតនេះ ត្រូវបានគេរាយការណ៍ថា ឥឡូវនេះជា «ជម្រើសឈានមុខគេ» ដើម្បីបញ្ចេញមូលនិធិរុស្ស៊ីដែលត្រូវបានបង្កក ហើយបញ្ជូនពួកគេទៅអ៊ុយក្រែន។ ទោះបីជាយ៉ាងណាក៏ដោយ គ្មានប្រទេសណាមួយដែលកំពុងត្រូវចោទសួរ បានអះអាងជាផ្លូវការនូវផែនការបែបនេះទេ។

ដោយធ្វើអត្ថាធិប្បាយលើសំណើរដែលបានរាយការណ៍នោះ លោក Peskov បាននិយាយថា វានឹង         «ខុសច្បាប់យ៉ាងធ្ងន់ធ្ងរ » ហើយបានសង្កត់ធ្ងន់ថា រុស្ស៊ីនឹងការពារផលប្រយោជន៍របស់ខ្លួន។