លោក Dmitry Peskov គឺជាអ្នកនាំពាក្យវិមានក្រឹមឡាំង និយាយនៅថ្ងៃអង្គារនេះថា ប្រធានាធិបតីរុស្ស៊ីលោក Vladimir Putin មានគម្រោងពិភាក្សាលើមជ្ឈមណ្ឌលឧស្ម័នជាមួយក្រុមមន្រ្តីទួរគី អំឡុងដំណើរទស្សនកិច្ចនាពេលខាងមុខរបស់លោកទៅកាន់ប្រទេសមួយនេះ ។ 

ពេលឆ្លើយសំណួររបស់ក្រុមអ្នកសារព័ត៌មានថាតើប្រធានាធិបតីរុស្ស៊ីលោក Vladimir Putin ដែលគ្រោងបំពេញទស្សនកិច្ចរបស់លោកទៅកាន់ប្រទេសទួរគី នឹងពិភាក្សាលើការបង្កើតពាណិជ្ជកម្មជាមួយទួរគីឬ លោក Peskov និយាយថា គ្មានមន្ទិលសង្ស័យអ្វីឡើយ បញ្ហាទាំងអស់នេះ នឹងស្ថិតនៅលើរបៀបវារៈ ។  

 លោកបន្តថា បញ្ហាពាណិជ្ជកម្ម និងសេដ្ឋកិច្ច នឹងត្រូវពិភាក្សាទាំងអស់ ពីព្រោះថា ទួរគី គឺជាប្រទេសដៃគូពាណិជ្ជកម្ម និងសេដ្ឋកិច្ចដ៏សំខាន់របស់ពួកយើង ហើយជាការពិតណាស់ថា ទស្សនីយភាពនៃទំនាក់ទំនងទាំងអស់នេះ នឹងស្ថិតនៅលើរបៀបវារៈរបស់ពួកយើង ។ 

ដោយឡែក មន្រ្តីមួយរូបរបស់ទួរគី និយាយប្រាប់ទីភ្នាក់ងារព័ត៌មានរ៉យទ័រថា ដំណើរទស្សនកិច្ចទៅកាន់ទួរគីរបស់លោក Putin ត្រូវបានគេរំពឹងថា នឹងធ្វើឡើងនៅថ្ងៃទី ១២ ខែកុម្ភៈខាងមុខនេះ ៕