ក្រុមឧទ្ទាមហ៊ួទីរបស់ប្រទេសយេម៉ែន ដែលមានសម្ព័នភាពជាមួយអ៊ីរ៉ង់ នៅថ្ងៃអង្គារ (ទី៦ ខែកុម្ភៈ) បាននិយាយថា ខ្លួនបានបាញ់មីស៊ីលទៅលើនាវា ២គ្រឿង នៅក្នុងសមុទ្រក្រហម ដោយបានបង្កការខូចខាតបន្តិចបន្តួចដល់នាវដឹកទំនិញ ១គ្រឿង ដែលកំពុងធ្វើដំណើរ នៅម្ដុំឆ្នេរសមុទ្រ Hodeidah របស់ប្រទេសយេម៉ែន។

ក្រុមហ៊ួទីបានកំណត់គោលដៅលើនាវាពាណិជ្ជកម្ម ដោយបាញ់យានដ្រូន និងមីស៊ីល នៅក្នុងសមុទ្រក្រហម តាំងពីពាក់កណ្តាលខែវិច្ឆិកា ជាអ្វីដែលពួកគេពណ៌នាថា ជាទង្វើសាមគ្គីភាពជាមួយប៉ាឡេស្ទីនប្រឆាំងនឹងអ៊ីស្រាអែល ក្នុងសង្រ្គាម នៅតំបន់ហ្កាហ្សា។

អ្នកនាំពាក្យយោធារបស់ក្រុមនេះបានប្រាប់ឲ្យដឹងថា ខ្លួនបានបាញ់មីស៊ីលរបស់កងទ័ពជើងទឹកដាក់នាវា Morning Tide និង Star Nasia ដោយកំណត់អត្តសញ្ញាណនាវាដែលមានទង់ជាតិរបស់កោះ Barbados (បាបាដុស) និងប្រជុំកោះ Marshall (ម៉ាសល) តាមលំដាប់លំដោយនេះថា ជារបស់ចក្រភពអង់គ្លេស និងសហរដ្ឋអាមេរិក។

ក្រុមហ៊ុនសន្តិសុខដែនសមុទ្ររបស់អង់គ្លេស Ambrey បានប្រាប់ថា នាវាដឹកទំនិញទូទៅដែលមានទង់ជាតិកោះបាបាដុស ដែលជាកម្មសិទ្ធិរបស់ក្រុមហ៊ុនអង់គ្លេសនោះ បានរងការខូចខាតដោយសារយានដ្រូន (UAV) ខណៈពេលកំពុងធ្វើដំណើរទៅភាគអាគ្នេយ៍កាត់សមុទ្រក្រហម។

ជាមួយគ្នានេះ មិនមានការរាយការណ៍ពីការរងរបួសនោះឡើយ។ ម្ចាស់នាវា Morning Tide ដែលជាក្រុមហ៊ុនអង់គ្លេស Furadino Shipping បានប្រាប់សារព័ត៌មាន Reuters ថា ពេលនេះ នាវាកំពុងធ្វើដំណើរដោយគ្មានបញ្ហាអ្វីឡើយ ប៉ុន្តែមិនបានផ្តល់ព័ត៌មានលម្អិតបន្ថែមនោះទេ៕