សេចក្តីថ្លែងការណ៍មួយ ដែលចេញផ្សាយដោយរដ្ឋាភិបាលរបស់ប្រទេសកូឡុំប៊ី និងកងទ័ពរំដោះជាតិ (ELN) បានឲ្យដឹងថា គូអរិទាំង២ បានយល់ព្រមបន្តបទឈប់បាញ់ទ្វេភាគីរបស់ពួកគេរយៈពេល ៦ខែទៀត។

សូមបញ្ជាក់ថា បទឈប់បាញ់ដំបូងរយៈពេល ៦ខែ បានផុតកំណត់កាលពីសប្តាហ៍មុន ហើយបន្ទាប់មកត្រូវបានបន្ត ៦ថ្ងៃទៀត។ តែអ្នកចរចាពីភាគីទាំង២ ដែលជួបប្រជុំនៅទីក្រុងហាវ៉ាណា បានបង្ហាញថា កិច្ចឈប់បាញ់ទ្វេភាគី ជាតិ និងបណ្តោះអាសន្ន (BNTFC) នឹងមានរយៈពេល ១៨០ថ្ងៃ។

សេចក្តីថ្លែងការណ៍ដែលបានចេញផ្សាយកាលពីពាក់កណ្តាលអធ្រាត្របានលើកឡើងថា ELN បានសម្រេច «ផ្អាកការដាក់ទណ្ឌកម្មសេដ្ឋកិច្ចជាឯកតោភាគី និងបណ្តោះអាសន្ន ជាការប្តេជ្ញាចិត្តដែលនឹងត្រូវបានតាមដានដោយយន្តការត្រួតពិនិត្យ និងផ្ទៀងផ្ទាត់»។

ទោះបីជា ELN បានផ្អាកការចាប់ជំរិត អំឡុងពេលចរចាក៏ដោយ ក៏មេដឹកនាំរបស់ក្រុមនេះ បានស្នើឲ្យរដ្ឋាភិបាលផ្ដល់ធនធានហិរញ្ញវត្ថុ ដើម្បីបន្តរក្សាយុទ្ធជនរបស់ពួកគេ ជាបញ្ហាដែលពួកគេកំពុងដោះស្រាយនៅក្នុងកិច្ចពិភាក្សា។

គួរបញ្ជាក់ដែរថា រដ្ឋាភិបាលរបស់ប្រធានាធិបតី លោក Gustavo Petro បានចាប់ផ្តើមកិច្ចចរចាសន្តិភាពឡើងវិញ ជាមួយ ELN ក្នុងឆ្នាំ២០២២ ដែលជាផ្នែកមួយនៃគោលនយោបាយ «សន្តិភាពទាំងស្រុង» ដើម្បីបញ្ចប់ជម្លោះរយៈពេល ៦ទសវត្សរ៍របស់ប្រទេសអាមេរិកខាងត្បូងមួយនេះ ដែលក្នុងនោះមនុស្សជាង ៤៥០.០០០នាក់ ត្រូវបានសម្លាប់៕