អតីតប្រធានាធិបតីប្រទេសឈីលី លោក សាបាសស្ទៀន ពីញ៉េរ៉ា (Sebastian Pinera) បានទទួលមរណភាពក្នុងឧបទ្ទវហេតុធ្លាក់ឧទ្ធម្ភាគចក្រកាលពីថ្ងៃអង្គារ (០៦ កុម្ភៈ) ដោយបានធ្វើឲ្យប្រជាជនក្នុងប្រទេសដែលលោកបានដឹកនាំអស់រយៈពេលពីរអាណត្តិនេះ រួមគ្នាកាន់មរណទុក្ខ និងជំរុញឱ្យមានការចូលរួមរំលែកទុក្ខពីបណ្ដាមេដឹកនាំនៅទូទាំងអាមេរិកឡាទីន។
ឧទ្ធម្ភាគចក្រដែលដឹកលោកអតីតប្រធានាធិបតី ពីញ៉េរ៉ា វ័យ ៧៤ឆ្នាំ និងមនុស្ស ៣នាក់ផ្សេងទៀតបានធ្លាក់ចូលទៅក្នុងបឹងមួយនៅភាគខាងត្បូងប្រទេសឈីលី។ អតីតប្រធានាធិបតីរូបនេះត្រូវគេប្រកាសថា បានស្លាប់ភ្លាមៗបន្ទាប់ពីក្រុមសង្គ្រោះបានទៅដល់កន្លែងកើតហេតុ ហើយចំណែកអ្នកដំណើរ ៣នាក់ទៀតបានរួចជីវិត។
ប្រភពចំនួនពីរបានប្រាប់សារព័ត៌មានរ៉យទ័រថា លោក ពីញ៉េរ៉ា គឺជាអ្នកបើកយន្តហោះនោះផ្ទាល់ ទោះបីជាមន្ត្រីមិនបានបញ្ជាក់ ឬប្រាប់ពីគោលដៅរបស់ឧទ្ធម្ភាគចក្រនោះក៏ដោយ។ លោក ពីញ៉េរ៉ា ជារឿយៗបានចំណាយពេលសម្រាករដូវក្តៅនៅអឌ្ឍគោលខាងត្បូងនៅជិតបឹងដ៏ស្រស់ស្អាតដែលស្ថិតនៅភាគខាងត្បូងនៃប្រទេសឈីលី ហើយជាញឹកញាប់បានបើកយន្តហោះផ្ទាល់ខ្លួនរបស់លោក។
ប្រធានាធិបតីបច្ចុប្បន្នរបស់ប្រទេសឈីលី លោក ហ្កាប្រ៊ីអ៊ែល បូរីក (Gabriel Boric) បានប្រកាសកាន់ទុក្ខជាតិរយៈពេលបីថ្ងៃ ខណៈការត្រៀមរៀបចំបានចាប់ផ្តើមសម្រាប់ពិធីបុណ្យសពរដ្ឋនៅថ្ងៃសុក្រ ខាងមុខសម្រាប់អតីតមេដឹកនាំដែលបានបម្រើការពីរអាណត្តិមិនជាប់គ្នារវាងឆ្នាំ២០១០ និងឆ្នាំ២០២២ រូបនេះ៕
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
