ត្បូងឃ្មុំ ៖ ឯកឧត្ដម ឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ នារសៀលថ្ងៃទី០៦ ខែកុម្ភៈ ឆ្នាំ២០២៤ បានដឹកនាំ ក្រុមការងារចុះពិនិត្យស្ថានភាពផ្លូវជនបទក្រាលកៅស៊ូពីរជាន់ប្រភេទ DBST​ ដែលរងការខូចខាតជា មួយខ្សែ មានទីតាំងតភ្ជាប់ពីផ្លូវជាតិលេខ៧ ត្រង់ចំណុច ភូមិ​ដំណាក់ចារ ឃុំអញ្ចើម ស្រុកត្បូងឃ្មុំ ទៅដល់ភូមិឈូកសរ ឃុំដូនតី ស្រុកពញាក្រែក ខេត្តត្បូងឃ្មុំ ដែល​មានប្រវែង ១៤,៨៤០ម៉ែត្រ ទទឹង ៥ម៉ែត្រ ។ និងបន្តចុះពិនិត្យការដ្ឋានស្ថាបនាផ្លូវមួយខ្សែទៀត ដែលមានប្រវែង ១១,២០០ម៉ែត្រ ដែល​តភ្ជាប់​ពី​ភូមិ​គោក​ស្រុក ឃុំគោកស្រុក ស្រុកតំបែរ ទៅភូមិទេព្យនិមិត្ត ឃុំគរ ស្រុត្បូងឃ្មុំ ខេត្តត្បូងឃ្មុំ ដែ​ល​ស្ថាបនា បានប្រមាណ ១០% នឹងគ្រោងបញ្ចប់នៅចុងឆ្នាំ២០២៤ នេះ ។

បើតាមលោក អាន ស៊ីណា ប្រធានមន្ទីអភិវឌ្ឍន៍ជនបទខេត្តត្បូងឃ្មុំ បានឳ្យដឹងថា ផ្លូវក្រាល​កៅ​ស៊ូ​ពីរ​ជាន់​ប្រភេទ DBST ដែលរងការខូចខាតជា មួយខ្សែ មានទីតាំងតភ្ជាប់ពីផ្លូវជាតិលេខ៧ ត្រង់​ចំណុច ភូមិដំណាក់ចារ ឃុំអញ្ចើម ស្រុកត្បូងឃ្មុំ ទៅដល់ភូមិឈូកសរ ឃុំដូនតី ស្រុកពញាក្រែក ខេត្តត្បូ​ងឃ្មុំ ដែលមានប្រវែង ១៤,៨៤០ម៉ែត្រ ទទឹង ៥ម៉ែត្រ កំពុងរងការខូចខាតយ៉ាងខ្លាំង ដែល​ចាំ​បាច់ត្រូវជួសជុលឡើងវិញ ខណៈការត្រួតពិនិត្យនេះដើម្បីវាយតម្លៃពីទំហ៊ំនៃការខូចខាត និង​ទឹកប្រាក់ដែលត្រូវជួសជុល ធ្វើសម្រួលដល់ការធ្វើដំណើររបស់ប្រជាពលរដ្ឋ ។ លោកបន្តថា ដោយ​ឡែកផ្លូវមួយខ្សែទៀតដែលកំពុងឈូសឆាយស្ថាបនា គឺក្រុមការងារ​បច្ចេក​ទេស និង​ពន្លឿន​ធ្វើ​យ៉ាងឲ្យ​បានរួចរាល់ក្នុងដំណាចឆ្នាំ២០២៤ នេះ ។

បន្ទាប់ពីចុះត្រួតពិនិត្យខ្សែផ្លូវទាំង ២ខ្សែ រួចមក ឯកឧត្ដមរដ្ឋមន្រ្តី និងក្រុមការងារក៏ បានបន្ត​អញ្ជើញ​ជួប​សំណេះសំណាល និងពិនិត្យសាលាបុណ្យ និងជាទីស្នាក់ការភូមិគំរូមួយកន្លែង ស្ថិតនៅ​ភូមិ​ល្វាតូច ឃុំគរ ស្រុកត្បូងឃ្មុំ និងបានជួបសំណេះសំណាល ជាមួយបង​ប្អូន​ប្រជា​ពលរដ្ឋ​នោះផ​ងដែរ ។ នៅក្នុងឳកាសជួបសំនេះសំណាលនោះ ឯកឧត្តម ឆាយ ឫទ្ធិសែន បានពាំនាំ​នូ​វការផ្ដាំផ្ញើសាកសួរសុខទុក្ខ ប្រកបដោយក្ដីនឹក​រលឹក​ពីសំណាក់​សម្តេច​អគ្គ​មហា​សេនាបតីតេជោ ហ៊ុន សែន អតីតនាយករដ្ឋមន្ដ្រី សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធាន​កាកបាទក្រហមកម្ពុជា និងសម្តេចមហាបវរធិបតី ហ៊ុន ម៉ាណែត នាយករដ្ឋមន្រ្ដី នៃព្រះរាជា​ណាចក្រកម្ពុជា ជូនប្រជាពលរដ្ឋទាំងអស់ ក្នុងនោះឯកឧត្តម​ក៏​បាន​ជូន​ឧបករ​ណ៍​បំពង​សំឡេង​ចំនួន ៥ឈុត ដល់សហគមន៍ខាងលើ ដើម្បីប្រើប្រាស់ផងដែរ ៕