ឯកឧត្តមអភិសន្ដិបណ្ឌិត ស សុខា ឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃ និង​ជា​ប្រធាន​គណៈ​កម្មាធិការជាតិសុវត្ថិភាពចរាចរណ៍ផ្លូវគោក បានដាក់បទបញ្ជាឲ្យផាកពិន័យ និង​ពិនិត្យ​រថយន្ដ​គ្រប់​ប្រភេទដែលបំពាក់ភ្លើងខុសលក្ខណៈបច្ចេកទេស ពិសេសការបំពាក់ភ្លើងសឺរ៉ែន ឬ​ភ្លើងហ្វា ដែលធ្វើឲ្យចាំងភ្នែកដល់អ្នកដទៃ និងមានហានិភ័យនៅពេលបើកបរឲ្យខាងតែបាន ដោយ​គ្មាន​ការ​យោគយល់ និងលើកលែងនោះឡើយ។

បទបញ្ជាយ៉ាងម៉ឺងម៉ាត់របស់ប្រមុខក្រសួងមហាផ្ទៃនេះ គឺបាន​ធ្វើឡើងក្នុ​ង​ឱកាស​អញ្ជើញ​ដឹកនាំ​កិច្ច​ប្រជុំ​បូក​សរុបលទ្ធផលការងារសុវត្ថិភាពចរាចរណ៍ផ្លូវគោក ឆ្នាំ២០២៣ និងលើកទិសដៅបន្ដ នៅ​ព្រឹក​ថ្ងៃទី០៧ ខែកុម្ភៈ ឆ្នាំ២០២៤នេះនៅទីស្តីការក្រសួងសារធារណការ និងដឹកជញ្ជូន ដោយ​មាន​ក្រសួង ស្ថាប័នពាក់ព័ន្ធ និងអាជ្ញាធរគ្រប់រាជធានី-ខេត្តទាំងអស់បានចូលរួម។

ឯកឧត្តមឧបនាយករដ្ឋមន្រ្តី ស សុខា បានសង្កត់ធ្ងន់ថា ការបំពាក់​ភ្លើង​ខុស​លក្ខណៈ​បច្ចេកទេស​ទាំង​ភ្លើង​ហ្វា និងភ្លើងក្រហមខៀវដូចភ្លើងសឺរ៉ែនរបស់សមត្ថកិច្ច តែងកើតមាន​ឡើង​នៅ​លើ​រថយន្ដ​ដឹក​ទំនិញ​ធុន​ធំ ហើយកន្លងទៅឯកឧត្តមឃើញ និងជួបរថយន្ដទាំងនោះ​ផ្ទាល់​ពេល​ធ្វើ​ដំណើរ​តាម​បណ្ដាខេត្ត។ ក្រៅពីការបំពាក់ភ្លើងខុសលក្ខណៈបច្ចេកទេស ឯកឧត្តម​ឧបនាយករដ្ឋ​មន្ដ្រី ​ស សុខា ក៏បានណែនាំឲ្យពិនិត្យមើលរថយន្ដទាំងឡាយ ពិសេស​រថយន្ដ​ដឹកនាំ​​ទំនិញ​ធុនធំ​ដែល​បិទ​ស្ទឹក​ឃ័រ​អក្សរ ឬរូបភាពផ្សេងនៅលើកញ្ចក់ ឬដាក់​រាំងនន ដែលធ្វើបាំងគំហើញ​នៅ​ពេល​បើកបរ ហើយជាកត្តាងាយរងគ្រោះថ្នាក់ដល់អ្នកដទៃនៅតាមដងផ្លូវផងដែរ។

នៅក្នុងឱកាសនោះដែរឯកឧត្តមរដ្ឋមន្រ្តីក្រសួងមហាផ្ទៃ ក៏បានមើលឃើញផងដែរថា កន្លង​ទៅ​ស្នង​ការ​នគរបាលរាជធានី-ខេត្តអនុវត្តការងារនេះបានល្អហើយ ប៉ុន្ដែហាក់​មិន​ទាន់​មាន​ប្រសិទ្ធ​ភាព ឬអស់ទាំងស្រុងនៅឡើយទេ ពោលឯកឧត្តមនៅបន្ដឃើញមានការដាក់វាំងនន ឬបិទអក្សរ ឬ​រូបភាពផ្សេងៗដោយផ្ទាល់តែម្ដង ហើយពេលខ្លះបើកកាត់គោលដៅសមត្ថកិច្ចតែម្ដង ដូច្នេះ​ត្រូវ​ពង្រឹង​យក​ចិត្តទុកដាក់លើការងារនេះឡើងវិញនៅគ្រប់គោលដៅទាំងអស់ចាប់ពីពេលនេះតទៅ។

បើយោងតាមរបាយការណ៍របស់អនុគណៈកម្មការទី២នៃគណៈកម្មាធិការជាតិសុវត្ថិភាពចរាចរណ៍ផ្លូវគោកបានឲ្យដឹងថា ឆ្នាំ២០២៣ គ្រោះថ្នាក់កើតឡើងសរុប ៣,៣១៧លើក(យប់៥៥%) បណ្តាល​ឲ្យស្លាប់១,៥៩០នាក់ និងរបួស៤,៥១៥នាក់ (ធ្ងន់២,៧៦៦នាក់)។ មូលហេតុបង្ក​គ្រោះថ្នាក់​រួមមាន បើកបរល្មើសល្បឿន ៤១% មិនគោរពសិទ្ធិ២២% មិនប្រកាន់ស្តាំ៩% បត់៩% ប្រជែងគ្រោះថ្នាក់៧% កត្តាយាន៥% ស្រវឹង៣% ភ្លើង/សញ្ញា១% សុខភាព/ងងុយ១% និង​កត្តា​អាកាស​ធាតុ​១%។ ក្នុងចំណោមអ្នកស្លាប់ជាអ្នកជិះម៉ូតូចំនួន ៨០% (១,២៧៩/១,៥៩០នាក់) មាន​អ្នកមិនពាក់មួកសុវត្ថិភាពចំនួន៦៩% (៨៨៨/១,២៧៩នាក់)៕ អត្ថបទ៖ បាន ចក់