ឯកឧត្តមឧត្តមសេនីយ៍ឯក ជួន ណារិន្ទ អគ្គស្នងការរងនគរបាលជាតិ និងជាស្នងការនគរបាលរាជធានីភ្នំពេញ បានអំពាវនាវ និងណែនាំឱ្យប្រជាពលរដ្ឋបង្កើនការប្រុងប្រយ័ត្ន និងបង្ការកុំឲ្យកើតមានគ្រោះអគ្គិភ័យនៅតាមខ្នងផ្ទះ ព្រមទាំងចេញបំរាមមិនឲ្យដុតផាវ កាំជ្រួចគ្រប់ប្រភេទក្នុងឱកាសបុណ្យចូលឆ្នាំថ្មីប្រពៃណីចិន និងវៀតណាមខាងមុខនោះឡើយ។

ឯកឧត្តម ឧត្តមសេនីយ៍ឯក ជួន ណារិន្ទ តាមរយៈកិច្ចសម្ភាសន៍ជាមួយ BTV បានសម្តែងក្តីព្រួយ​បារម្ភ​ជាខ្លាំងអំពីករណីកើតគ្រោះអគ្គិភ័យនៅក្នុងរាជធានីភ្នំពេញ ជាពិសេសនៅក្នុងថ្ងៃចូលឆ្នាំថ្មីប្រពៃណីចិន និងវៀតណាមខាងមុខនេះដែលមានការដុតទៀនធូប និងក្រដាសសែនជាច្រើននៅតាមផ្ទះប្រជាពលរដ្ឋដែលជាប់សែរស្រឡាយចិន វៀតណាម ដែលនឹងប្រព្រឹត្ត ទៅចាប់ពីថ្ងៃទី៩ ដល់ថ្ងៃទី១១ ខែកុម្ភៈនេះ។

ឯកឧត្តមឧត្តមសេនីយ៍ឯក ជួន ណារិន្ទ បានឱ្យដឹងថា ចាប់ពីដើមឆ្នាំ២០២៤ មកដល់ពេលបច្ចុប្បន្ននេះក្នុងរាជធានីភ្នំពេញមានករណីគ្រោះអគ្គិភ័យកើតឡើងស្ទើតែរាល់ថ្ងៃជាប់ៗគ្នា ក្នុងនោះថ្ងៃខ្លះកើតមាន៣ករណីនៅទីតាំងផ្សេងពីគ្នាក៏មាន។

យោងតាមរបាយការណ៍របស់ការិយាល័យបង្ការពន្លត់អគ្គិភ័យ និងសង្គ្រោះនៃស្នងការនគរបាលរាជធានីភ្នំពេញបានឱ្យដឹងថា នៅរាជធានីភ្នំពេញ ករណីគ្រោះអគ្គិភ័យបានកើតមានចាប់ពីថ្ងៃ២ខែមករា ២០២៤ ដល់ថ្ងៃទី ៦កុម្ភៈ ២០២៤ មានចំនួន ២៧ ករណី។ ដូច្នេះដើម្បីរក្សាបាននូវសន្តិសុខសុវត្ថិភាព ក្នុងឱកាសបុណ្យចូលឆ្នាំថ្មីប្រពៃណីចិន និងវៀតណាមនេះដែលនឹងប្រព្រឹត្តទៅចាប់ពីថ្ងៃទី៩ ដល់ថ្ងៃទី១១ ខែកុម្ភៈនេះ ស្នងការនគរបាលរាជធានីភ្នំពេញបានណែនាំដល់មន្ត្រីនគរបាលខណ្ឌទាំង ១៤ និងសាធារណជនទាំងអស់ត្រូវប្រុងប្រយ័ត្នក្នុងការអុជទៀនធូប ក្រដាសសែន ភ្លើងចង្ក្រាន ចរន្តអគ្គិសនី ដែលអាចបង្កឱ្យមានគ្រោះអគ្គិភ័យកើតឡើងជាយថាហេតុ៕ អត្ថបទ ភារម្យ