កំពត៖ ស្ថានភាពអ្នកឆ្លងជំងឺកូវីដ១៩ នៅខេត្តកំពតកាន់តែរីករាលដាលបាច់សាចច្រើនឡើងៗ ពីមួយថ្ងៃទៅមួយថ្ងៃ។ ជាក់ស្តែងនៅថ្ងៃទី០១ ខែកក្កដានេះ យោងតាមលទ្ធផល នៃការវិភាគវត្ថុសំណាករកមេរោគកូវីដ-១៩ ខេត្តកំពតបានរកឃើញអ្នកវិជ្ជមាន ចំនួន ១៣៣នាក់ភាគច្រើនជាកម្មការនីរោងចក្រ។
ខេត្តកំពត បានចូលរួមទប់ស្កាត់ការឆ្លងរីករាលដាលជំងឺកូវីដ-១៩ បានយ៉ាងល្អប្រសើរនាពេលកន្លងមក ហើយទូទាំងខេត្ត ស្ទើរគ្មានអ្នកកើតជំងឺកូវីដ១៩។
ប៉ុន្តែ ក្រោយពេលផ្ទុះការឆ្លងរីករាលដាលនៅកាស៊ីណូតំបន់ច្រកទ្វារព្រំដែនទ្វេភាគីតន់ហន់ និងច្រកទ្វារព្រំដែនអន្តរជាតិព្រែកចាក រហូតមកដល់ថ្ងៃនេះ គឺមួយខែគត់ដែលខេត្តកំពតចាប់ផ្តើមរកឃើញអ្នកវិជ្ជមានកូវីដ-១៩ មិនដែលដាច់ និងចេះតែកើនឡើងជាលំដាប់។
ជាក់ស្តែងនៅរសៀលថ្ងៃទី០១ ខែកក្កដា ឆ្នាំ២០២១នេះ យោងតាមលទ្ធផល នៃការវិភាគវត្ថុសំណាករកមេរោគកូវីដ-១៩ និង សេចក្តីជូនដំណឹងរបស់រដ្ឋបាលខេត្តកំពត បានប្រកាសថា រកឃើញអ្នកវិជ្ជមានថ្មីចំនួន ១៣៣នាក់បន្ថែមទៀត ក្នុងនោះ ស្រីនាក់ ១១៨នាក់។ អ្នកឆ្លងខាងលើត្រូវបានដាក់ឱ្យសំរាកព្យាបាល នៅមណ្ឌលព្យាបាលក្នុងខេត្តកំពត។ ហើយបច្ចុប្បន្នក្រុមឆ្លើយតបបន្ទាន់ បាននឹងកំពុងស្រាវជ្រាវរកទីតាំង និងកំណត់មុខសញ្ញាអ្នកដែលពាក់ព័ន្ធជាមួយអ្នកវិជ្ជមានទាំង ១៣៣នាក់ខាងលើជាបន្តទៀត។
អាជ្ញាធរខេត្តកំពត នៅតែបន្តអំពាវនាវឱ្យអ្នកដែលធ្លាប់ពាក់ព័ន្ធនឹងអ្នកវិជ្ជមានកូវីដ-១៩ខាងលើ សូមធ្វើចត្តាឡីស័ក តាមការណែនាំ របស់ក្រសួងសុខាភិបាល និងត្រូវចូលរួមដោយស្ម័គ្រចិត្ត ក្នុងការយកសំណាកទៅពិនិត្យ ក្នុងករណីសង្ស័យថា មានរោគសញ្ញានៃជំងឺកូវីដ១៩។
គិតត្រឹមល្ងាចថ្ងៃទី០១ ខែកក្កដានេះ ព្រឹត្តិការណ៍សហគមន៍២០កុម្ភៈ ទូទាំងខេត្តកំពត មានអ្នកឆ្លងកូវីដ-១៩ ចំនួន ១៦៥២នាក់ កំពុងសម្រាកព្យាបាល ចំនួន ៦៨២នាក់ និងអ្នកជាសះស្បើយចំនួន ៩៥៣នាក់ និងមានអ្នកស្លាប់ចំនួន ១៧នាក់៕
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
