ព្រះមហាក្សត្រ ឆាលស៍ (Charles) របស់ចក្រភពអង់គ្លេស បានបង្ហាញស្នាមញញឹម ទៅកាន់អ្នកធ្វើដំណើរតាមផ្លូវ កាលពីថ្ងៃអង្គារ (០៦ កុម្ភៈ) ខណៈទ្រង់ត្រូវបានគេមើលឃើញជាសាធារណៈជាលើកដំបូងចាប់តាំងពីត្រូវបានគេបង្ហាញថាទ្រង់មានជម្ងឺមហារីក ហើយខណៈដែលកូនប្រុសពៅរបស់ទ្រង់គឺព្រះអង្គម្ចាស់ ហារី (Harry) បានហោះទៅប្រទេសអង់គ្លេស ដើម្បីជួបបិតារបស់ទ្រង់។

ព្រះបរមរាជវាំង បាក់ឃីងហែម (Buckingham) បានប្រកាសកាលពីថ្ងៃចន្ទថា ព្រះមហាក្សត្រ ឆាលស៍ ដែលមានព្រះជន្ម ៧៥ ព្រះវស្សា និងបានគ្រងរាជ្យលើបល្ល័ង្កក្នុងរយៈពេលតិចជាង ១៨ ខែចាប់តាំងពីការសោយព្រះពិរាល័យរបស់មាតាទ្រង់គឺព្រះមហាក្សត្រី អេលីហ៊្សាបេត (Elizabeth) ត្រូវបានធ្វើរោគវិនិច្ឆ័យថាមានជំងឺហើយនឹងពន្យារពេលការបង្ហាញព្រះវត្តមានជាសាធារណៈរបស់ទ្រង់ដើម្បីទទួលការព្យាបាល។

ព្រះអង្គ ឆាលស៍ បានគ្រវីព្រះហស្ដទៅកាន់អ្នកធ្វើដំណើរឆ្លងកាត់កាលពីរសៀលថ្ងៃអង្គារ ខណៈដែលយាងព្រះរាជដំណើរពីរាជដំណាក់ ឃ្លែររិន ហៅស៍ (Clarence House) របស់ទ្រង់នៅកណ្តាលទីក្រុងឡុងដ៍ ទៅកាន់ព្រះបរមរាជវាំង បាក់ឃីងហែម។ បន្ទាប់មក ព្រះអង្គ និងព្រះមហេសីរបស់ទ្រង់គឺម្ចាស់ក្សត្រី ខែមមីឡា (Camilla) បានយាងជិះឧទ្ធម្ភាគចក្រទៅកាន់វិមាន សានឌ្រីងហែម (Sandringham) របស់ទ្រង់នៅតំបន់ជនបទភាគខាងកើតដែនដីអង់គ្លេស ដើម្បីចាប់ផ្តើមការសម្រាកព្យាបាល។

មិនយូរប៉ុន្មានមុនពេលការចាកចេញរបស់ព្រះមហាក្សត្រចក្រភពអង់គ្លេសអង្គនេះ ព្រះអង្គម្ចាស់ ហារី ដែលបានឃ្លាតឆ្ងាយចេញពីគ្រួសាររាជវង្ស ចាប់តាំងពីទ្រង់បានលាឈប់ពីព្រះរាជកិច្ចរាជវង្សជិតបួនឆ្នាំមុន ត្រូវគេមើលឃើញថាបានយាងដល់រាជដំណាក់ ឃ្លែររិន ហៅស៍ ហើយបានជួបគាល់រយៈពេលខ្លីជាមួយបិតាទ្រង់៕