ក្រុមអ្នកសម្រុះសម្រួលរបស់សហរដ្ឋអាមេរិក កាតា និងអេហ្ស៊ីប បានរៀបចំការជំរុញការទូតដើម្បីតភ្ជាប់ភាពខ្វែងគំនិតគ្នារវាងអ៊ីស្រាអែល និងក្រុមហាម៉ាស ព្រមទាំងស្វះស្វែងរករូបមន្តចុងក្រោយលើផែនការបទឈប់បាញ់សម្រាប់តំបន់ហ្កាហ្សា បន្ទាប់ពីក្រុមប៉ាឡេស្ទីនមួយនេះបានឆ្លើយតបនឹងសំណើសម្រាប់ការផ្អាកប្រយុទ្ធ និងការដោះលែងចំណាប់ថ្នូរ។

ក្រុមហាម៉ាស កាលពីថ្ងៃអង្គារ បានឆ្លើយតបទៅនឹងក្របខណ្ឌមួយដែលគូរឡើងកាលពីជាងមួយសប្តាហ៍មុនដោយប្រមុខចារកម្មអាមេរិក និងអ៊ីស្រាអែល នៅឯកិច្ចប្រជុំនៅទីក្រុងប៉ារីស ជាមួយអេហ្ស៊ីប និងកាតា ប៉ុន្តែព័ត៌មានលម្អិតនៃការឆ្លើយតបនេះមិនត្រូវបានបង្ហាញទេ។

ប្រភពជិតស្និទ្ធនឹងកិច្ចពិភាក្សានេះបាននិយាយថា បទឈប់បាញ់នឹងមានរយៈពេលយ៉ាងហោចណាស់ ៤០ថ្ងៃ ក្នុងអំឡុងពេលដែលពួកសកម្មប្រយុទ្ធនេះ ដោះលែងជនស៊ីវិលក្នុងចំណោមចំណាប់ថ្នូរដែលនៅសល់។

នាយករដ្ឋមន្ត្រីអ៊ីស្រាអែល លោក បេនចាមីន ណេតាន់យ៉ាហ៊ូ (Benjamin Netanyahu) បានទទូចថា អ៊ីស្រាអែលនឹងមិនបញ្ចប់យុទ្ធនាការហ្កាហ្សា របស់ខ្លួនឡើយ រហូតទាល់តែក្រុមហាម៉ាស ត្រូវបានកម្ចាត់ ហើយលោកបានច្រានចោលការបង្កើតរដ្ឋប៉ាឡេស្ទីន។

ក្រសួងការបរទេសអារ៉ាប៊ីសាអូឌីតបាននិយាយនៅក្នុងសេចក្តីថ្លែងការណ៍មួយថា អារ៉ាប៊ីសាអ៊ូឌីតបានប្រាប់សហរដ្ឋអាមេរិកថា ជំហររបស់ខ្លួននឹងមិនមានទំនាក់ទំនងការទូតជាមួយអ៊ីស្រាអែលទេ លុះត្រាណាតែរដ្ឋប៉ាឡេស្ទីនឯករាជ្យមួយត្រូវបានទទួលស្គាល់នៅព្រំដែនឆ្នាំ១៩៦៧ ជាមួយក្រុងហ្សេរុយសាឡឹម ខាងកើត ហើយនិង «ការឈ្លានពាន» របស់អ៊ីស្រាអែលនៅក្នុងតំបន់ហ្កាហ្សា ត្រូវបញ្ចប់៕