ក្រសួងសុខាភិបាលដែលគ្រប់គ្រងដោយក្រុមហាម៉ាស បាននិយាយកាលពីថ្ងៃអង្គារ (០៦ កុម្ភៈ) ថាចំនួនអ្នកស្លាប់របស់ប៉ាឡេស្ទីន នៅតំបន់ហ្កាហ្សាស្ទ្រីប ពីការវាយប្រហាររបស់អ៊ីស្រាអែល បានកើនឡើងដល់ ២៧.៥៨៥ នាក់ និងមនុស្ស ៦៦.៩៧៨ នាក់ផ្សេងទៀតបានរងរបួស។

នៅក្នុងសេចក្តីថ្លែងការណ៍មួយ ក្រសួងនេះបាននិយាយថា កងកម្លាំងអ៊ីស្រាអែលបានសម្លាប់ជនជាតិប៉ាឡេស្ទីន ១០៧ នាក់ និងបង្ករបួស ១៤៣ នាក់ផ្សេងទៀតក្នុងរយៈពេល ២៤ ម៉ោងកន្លងមកនេះ។

ក្រសួងបានបន្ថែមថា ជនរងគ្រោះមួយចំនួននៅតែស្ថិតនៅក្រោមគំនរបាក់បែក ដោយសារតែមានការទម្លាក់គ្រាប់បែកយ៉ាងធ្ងន់ធ្ងរ ព្រមទាំងខ្វះអ្នកការពារស៊ីវិល និងក្រុមរថយន្តគិលានសង្គ្រោះ។

ទីភ្នាក់ងារសង្គមអឌ្ឍចន្ទក្រហមប៉ាឡេស្ទីន បាននិយាយនៅក្នុងសេចក្តីថ្លែងការណ៍មួយថា ខ្លួនបានជម្លៀសជនភៀសខ្លួនប្រហែល ៨.០០០ នាក់ចេញពីមន្ទីរពេទ្យ អាល់អាម៉ាល់ (Al Amal) និងទីស្នាក់ការកណ្តាលរបស់ខ្លួននៅក្រុង ខាន់ យូនីស (Khan Younis) បន្ទាប់ពីការឡោមព័ទ្ធរយៈពេល ១០ ថ្ងៃ។

កងកម្លាំងការពារអ៊ីស្រាអែល (IDF) បានប្រកាសកាលពីល្ងាចថ្ងៃអង្គារ ថាទាហានអ៊ីស្រាអែលម្នាក់ត្រូវបានសម្លាប់នៅភាគខាងជើងតំបន់ហ្កាហ្សាស្ទ្រីប ដែលនាំឱ្យចំនួនអ្នកស្លាប់នៃប្រតិបត្តិការយោធាជើងគោកអ៊ីស្រាអែល នៅតំបន់នេះកើនឡើងដល់ ២២៦ នាក់៕