រដ្ឋមន្ត្រីការបរទេសអាមេរិក លោក អាន់តូនី ប្លីងខិន (Antony Blinken) បានទៅដល់អ៊ីស្រាអែល សម្រាប់លទ្ធភាពនៃកិច្ចប្រជុំដ៏លំបាក លើកិច្ចព្រមព្រៀងបទឈប់បាញ់ថ្មីជាមួយបណ្ដាមេដឹកនាំ និងក្រុមមន្ត្រីអ៊ីស្រាអែល ដែលបានបង្ហាញភាពធន់នឹងសម្ពាធពីទីក្រុងវ៉ាស៊ីនតោន ម្តងហើយម្តងទៀត ជុំវិញការធ្វើសង្រ្គាមរបស់ពួកគេប្រឆាំងនឹងក្រុមហាម៉ាស ខណៈដែលពួកសកម្មប្រយុទ្ធប៉ាឡេស្ទីនមួយនេះបានឆ្លើយតបលើកិច្ចព្រមព្រៀងបទឈប់បាញ់ជុំថ្មី។

លោក ប្លីងខិន បានធ្វើដំណើរកាលពីយប់ថ្ងៃច័ន្ទ ពីទីក្រុង អាល់យូឡា (AlUla) របស់អារ៉ាប៊ីសាអ៊ូឌីត ជាទីដែលលោកបានជួបពិភាក្សាជាមួយព្រះអង្គម្ចាស់ ម៉ូហាមេដ ប៊ីន សាលម៉ាន (Mohammed bin Salman) ក្នុងដំណើរទស្សនកិច្ចមជ្ឈិមបូព៌ាក្នុងគោលបំណងឈានដល់ការឯកភាពគ្នាលើអនាគតរបស់តំបន់ហ្កាហ្សា។

នៅក្នុងដំណើរទស្សនកិច្ចលើកទីបួនរបស់ខ្លួនទៅកាន់មជ្ឈិមបូព៌ាក្នុងរយៈពេលបីខែ លោក ប្លីងខិន នឹងព្យាយាមបញ្ចុះបញ្ចូលនាយករដ្ឋមន្ត្រីអ៊ីស្រាអែល លោក បេនចាមីន ណេតាន់យ៉ាហ៊ូ (Benjamin Netanyahu) ឱ្យចាប់ផ្តើមការចរចាដ៏ម៉ឹងម៉ាត់លើអភិបាលកិច្ចក្រោយសង្គ្រាមនៅហ្កាហ្សា និងឲ្យប្រឹងប្រែងបន្ថែមទៀតដើម្បីការពារជនស៊ីវិល ហើយនិងអនុញ្ញាតឱ្យមានជំនួយបន្ថែមទៀតចូលទៅក្នុងទឹកដីនេះ។

ខណៈពេលដែលលោក ប្លីងខិន មិនបានបង្ហាញពីទស្សនៈដែលសហរដ្ឋអាមេរិកមាន ចំពោះការឆ្លើយតបរបស់ក្រុមហាម៉ាសនោះ លោកប្រធានាធិបតី ចូ បៃដិន (Joe Biden) បានពណ៌នាការឆ្លើយតបនោះថាជា «រឿងហួសហេតុ» ដោយលើកឡើងថា ថ្នាក់ដឹកនាំអ៊ីស្រាអែល នឹងមិនងាយស្រួលយល់ព្រមចំពោះអ្វីដែលក្រុមហាម៉ាស កំពុងស្នើសុំនោះទេ៕